Galaxy S20 Ultra таннархи ҳисобланди – Samsung уни неча баравар қимматга сотяпти?

  •   DiMaX
  •  4124
  •  06.03.2020 09:48

Galaxy S20 Ultra таннархи ҳисобланди – Samsung уни неча баравар қимматга сотяпти?

Samsung компаниясининг энг қиммат смартфони (букламафонларини ҳисобга олмаганда, албатта) ҳозирда Galaxy S20 Ultra бўлиб турибди. Хўш, аслида уни ишлаб чиқариш компаниянинг ўзига қанчага тушишини ҳеч ўйлаб кўрганмисиз?

ЎҚИНГ: Galaxy S10+ таннархи аниқланди: Samsung уни икки баравардан ошиққа сотяпти!

TechInsights мутахассислари Galaxy S20 Ultra ичини очиб, унинг барча компонентларининг нархларини ҳисоблаб, бу смартфоннинг таннархини аниқлашди. Уларнинг хулосасига кўра, мазкур флагмандан биттаси, йиғиш харажатларини ҳам қўшиб ҳисоблаганда, Samsung учун атиги 528,5 долларга тушади. Бу нарх смартфоннинг Snapdragon 865, 12/256 ГБлик хотирага эга конфигурацияли вариантига тегишли. АҚШда эса унинг 128 гигабайтлиги учун 1400 доллар нарх белгиланган; яъни жанубий кореяликлар бу флагманини уч баравар қимматга сотишяпти!

Таққослаш учун келтириб ўтсак, яқинда мутахассислар Xiaomi Mi 10 флагманини ҳам шунақа текшириб кўришган эди. Барча компонентлари ва йиғиш харажатларини қўшганда, унинг таннархи 440 доллар экан. Жанубий кореялик техногигантдан фарқли равишда, Xiaomi инсоф билан иш тутган – бозорга бу моделини 675 доллардан чиқарган.

ЎҚИНГ: Galaxy F буклама смартфони таннархини Galaxy S9+ ҳамда iPhone XS Max’ники билан солиштирамиз!

TechInsights сайтининг тегишли саҳифасида Samsung Galaxy S20 Ultra компонентларидан ҳар бирининг таннархи ҳақидаги ва бошқа маълумотлар батафсил (инглиз тилида) берилган. Масалан, унинг энг қиммат қисми – камералар жамланмаси экан: нақ 107,5 доллар; бу нархга эса бундайроқ битта смартфон олса бўлади! Шунингдек, Snapdragon 865 процессори (81 доллар) ва дисплей (67 доллар) ҳам қиммат компонентлардан ҳисобланади. Қолган қисмларининг аксарияти 30 доллардан қиммат турмайди.

Шу ўринда Samsung’нинг олдинги флагманлари таннархига ҳам назар солиб ўтсак, қизиқ бир жиҳатга дуч келамиз: Galaxy S9+ компанияга 380 долларга тушган бўлса, Galaxy S8+ таннархи 343 доллар эди. Galaxy S10+ моделига келиб эса бу кўрсаткич 420 долларни ташкил этган. Яъни, йил сайин Samsung флагманлари нафақат қимматлашиб боряпти, балки уларнинг таннархлари ҳам ошиб бормоқда. Лекин барибир, Galaxy S20 Ultra ўз таннархидан уч баравар қимматга сотилиши унчалик ҳам инсофдан эмас-да...

ЎҚИНГ: iPhone XS Max таннархини ҳисоблашди – Apple инсофиниям «қўшиб еб юборган» экан!

Сайтимизнинг энг чиройли расмларини Инстаграмдаги саҳифамизда томоша қилинг!