Galaxy S23 Ultra'ни синдириш бандасигамас!

Galaxy S23 Ultra'ни синдириш бандасигамас!

Феврал ойининг илк санасида Samsung компанияси ўзининг янги Galaxy S23, Galaxy S23+ ва Galaxy S23 Ultra смартфонларини тақдим қилди. Шубҳасиз, улар орасидаги Ultra модел ўз номига яраша юқори техник хусусиятларга эга. Унинг камераси ҳатто Илон Маскни ҳам ҳайратлантирди. Бироқ, ички хусусиятлардан ташқари қурилманинг ўзи қанчалик мустаҳкам? Бу саволга JerryRigEverything'нинг янги видеосидан жавоб олишимиз мумкин.

Зак, JerryRigEverything номи билан танилган YouTube канал муаллифи Galaxy S23 Ultra смартфонини ўз "имтиҳони"дан ўтказди. Ҳар доимгидек, қийноқлар биринчи бўлиб смартфон экранидан бошланди. Айтиш керакки, Galaxy S23 сериясидаги смартфонлар, хусусан, S23 Ultra экрани ҳам Corning компаниясининг энг сўнгги авлод ҳисобланмиш Gorilla Glass Victus 2 ойнаси билан ҳимояланган. Гарчи бу "яхшиланиш" каби эшитилса ҳам, тест унинг ҳеч қандай афзалликка эга эмаслигини кўрсатди: смартфон экрани Моҳс шкаласининг 6 даражасидаёқ тирналишни бошлади, 7 даражада эса чуқурроқ тирналиш излари пайдо бўлди. Бу эса ўтган йилги Galaxy S22 Ultra натижаси билан бир хил.

Экрандан узоқлашмаймиз. У ҳақида хулоса чиқаришга шошилманг. Дисплей тирналиши ҳайратланарли натижа билан якунланмаган бўлмасада, унинг оловга чидамлилиги сизни қойил қолдириши аниқ. Зак S23 Ultra'нинг экранига 60 сония тўхтовсиз олов тутиб турди, лекин экранга деярли ҳеч қандай зарар етмади. Одатда бошқа флагманлар экранида ушбу вақтнинг ярмидан бошлаб куйиш изларини кўриш мумкин бўлар эди.

Зак қурилма ён томонларини аёвсиз қирди – зирҳли алюминий "тери" осонгина "шилинди". Бундан ташқари, видеода смартфоннинг ён тугмаларини ҳам бироз кучлироқ ҳаракат билан чиқариб олишингиз мумкинлигини кўрасиз.

S Pen'га келадиган бўлсак, уни эҳтиёт қилганингиз маъқул. Зак уни чўпни синдиргандек, шунчаки икки бўлиб қўйди.

Сўнгги қийноқ. Зак смартфонни икки буклаб синдирмоқчи. У қанчалик чиранмасин Galaxy S23 Ultra ўзининг "ултра" эканлигини кўрсатиб қўйди. Қурилма деярли эгилмади. У тошдек қаттиқ.

Бу сиз 1200 долларлик Samsung флагманидан кутишингиз мумкин бўлган мустаҳкамликдир. Албатта, сиз смартфондан кундалик фойдаланишда унинг экрани ёки ён томонларини ўткир тиғли нарсалар билан тирнаб кўрмайсиз. Аксинча уни асраб-авайлайсиз. Юмшоқ бармоқларингиз эса 99.9% ҳолатда смартфонга зарар етказмайди. Хулоса шуки, Galaxy S23 Ultra ҳеч қандай ортиқча ҳимоя воситаларисиз ҳам сизга узоқ йиллик чидамлилик таклиф қила олади.

ЎҚИНГ: 240 Вт тезликда қувватланадиган илк смартфон расман тақдим қилинди

Сайт янгиликларидан доимий хабардор бўлиш учун Телеграм каналимизга қўшилинг!