Galaxy S7 арзонроқ бўлади ёхуд Samsung`нинг нарх сиёсати ўзини оқлайдими?
Бу ҳафта Samsung компанияси вакили смартфонлар бозори стагнацияси (савдо-сотиқнинг узоқ муддат тўхтаб қолиши)га бағишланган ҳар йиллик маросимда қатъий чоралар кўриш лозимлигини таъкидлаб ўтди. Компания вице-президентининг таъкидлашича, Samsung «фавқулодда ўзгаришлар»ни амалга ошириши лозим, акс ҳолда бу бозорда яшаб қолиш имконсиз. Бу борада бирор аниқ маълумот ошкор қилинмаган бўлса ҳам, интернетда компания янги нарх сиёсатини олиб боришга тайёргарлик кўраётгани ҳақида хабарлар пайдо бўлди.
Таҳлилчи Пан Жутанг маълумотига кўра, Жанубий Корея технологик гиганти янги Galaxy S7 флагман смартфонини 2015 йилда савдога чиқарилган Galaxy S6 смартфонига қараганда 10 фоиз арзонроққа сотишни режалаштирмоқда. Арзонроқ маҳсулотлар тақдим этиш орқали Samsung бозордаги рақобатбардошлигини мустаҳкамламоқчи.
Galaxy S7 смартфони бу йил одатдагидан эртароқ тақдим этилади. Бу ҳолатни кўпчилик, жумладан, обрўли таҳлилчилар аксарият харидорлар Хитой смартфонларини сотиб олаётгани, натижада компаниянинг бозордаги улуши тобора камайиб кетаётгани билан изоҳлашмоқда. Маълумотларга кўра, смартфонлар бозори етакчиси бизнесга нисбатан муносабатини тўлиқ қайта кўриб чиқиб, Европада бюджет (арзон) ускуналар сотишни тўхтатмоқчи. Аввал тасдиқланганидек, у тараққий этган мамлакатларда топ (олий тоифали) гаджетлар ишлаб чиқарувчиси образини яратмоқчи, ривожланаётган бозорлар учун эса қиммат бўлмаган ускуналарнинг кенг танловини тақдим этади.
Янги Galaxy S7 смартфонидан нималар кутилмоқда? Баъзи маълумотларга кўра, топ смартфон код номи Mongoose бўлган янги Exynos 8890 процессори асосида ишлайди. Шунингдек, янги маҳсулот кўз қорачиғи сканери, USB Type-C чиқиш порти ва экранга босилган кучга сезувчанлик датчиги билан таъминланади. Бу сафарги смартфон корпуси магнийли қотишмадан тайёрланиши мумкин.
