“Galaxy S8” деб тахмин қилинган жозибадор смартфон

“Galaxy S8” деб тахмин қилинган жозибадор смартфон

Samsung компаниясининг Galaxy S8 флагмани тақдим қилинмаган бўлишига қарамасдан, унинг суратлари ва фаолият кўрсатаётган жараён ёзиб олинган видео интернет тармоғида тарқалиб кетди.

Ахборот технологиялари мутахассиси Эван Бласс жорий ҳафта бошида S8’нинг чинакам суратлари деб тахмин қилинаётган расмларни ўз блогида эълон қилди.

Суратда 6,2 дюймли дисплей атрофи юпқа рамкага эга Super AMOLED экранли смартфон тасвирланган. Олд панелнинг юқори қисмидаги рамка гаджетнинг 8 МП олд камераси ва у билан ёнма-ён турган кўзнинг рангдор пардасини сканер қилувчи сенсорни қоплаб олган.

S8 деб тарқатилган аввалги суратлардан фарқли ўлароқ, бу гал тарқалган тасвирларда навбатдаги илғор флагман дизайни билан яқиндан танишиш мумкин. Суратга қараб смартфоннинг ён томонга қайрилган экрани, юпқа ва силлий дизайнга эгалигига гувоҳ бўлиш мумкин.

Миш-мишларга зид ўлароқ, Samsung ушбу телефонда анъанавий 3.5 мм аудио коннектордан воз кечмаган. Суратларга кўра, Galaxy S8’даги USB-C порти ҳам қувватлаш, ҳам маълумот алмашишда фойдалананилади.

Шунингдек, янги гелекси тасвирланган видеода кўриш мумкинки, “тугмасиз” экран яратиш иштиёқи бармоқ излари сканерини орқа панелга кўчирилишига сабаб бўлган.

Маълумотларга кўра, “8-галактика”да Samsung’нинг Bixby номли янги овозли виртуал ёрдамчиси бўлади. Шунингдек, флагман Qualcomm’нинг илғор Snapdragon 835 процессори билан таъминланади. Бир оз аввал тақдим қилинган Sony’нинг 4K экранли Xperia XZ Premium “ақлли телефони” ҳам ушбу процессорга эга.

Видео:

Samsung Жаҳон Мобиль Конгрессида ушбу флагманнинг 29 март куни тақдим этилишини маълум қилган. Европада 5,8 дюймли Samsung Galaxy S8 телефони 799 доллар, 6,2 дюймли версияси 899 евродан сотилиши хабар қилинмоқда.