Galaxy S8 эгалари азият чекаётган ёқимсиз муаммо
Жорий йилнинг март ойида тақдим этилган ва айни дамда жаҳон смартфон бозорининг “шоҳ асар”ларидан бири бўлиб турган Samsung Galaxy S8 флагман смартфони сотувга чиққан кунидан бошлаб кичик носозликлар ва муаммолар гирдобида қолди.
Жумладан, Samsung Galaxy S8 экранининг ўта юпқа ҳимоя шишаси жуда мўрт бўлиб, унга эҳтиёткорлик билан муносабатда бўлиш керак. Бу муаммо оммавий равишда эътироф этилмоқда.
Galaxy S8 қатор блогерларнинг “мўлжали”га ҳам тушиб улгурди. Жумладан, таниқли блогер Алекс Экслер яп-янги гелекси пластик корпусли клавиатурага енгил урилиб кетиши оқибатида экран шишасидан айрилиб қолганини ёзади.
SquareTrade халқаро суғурта компанияси ҳам Galaxy S8 билан боғлик “креш-тест”ларни ўтказиб кўрди. Корпуснинг ҳимояланганлик даражасини аниқлайдиган бу тестга кўра, кореялик янги смартфоннинг корпуси энг паст даражани кўрсатган.
Натижаларга кўра, Galaxy S8 100 дан 76 балл тўплаган. Мутахассисларнинг фикрича, корпусни қоплаб олган ҳимоя шишаси жуда нозик ва енгил зарблар ҳам унга дарз кетказа олади. Бу муаммо Galaxy S8’нинг металл рамкага эга бўлмагани билан боғлиқ.
Немис тадқиқотчилари ҳам шундай тажриба ўтказиб кўришди: Galaxy S8 флагманини 80 см ўлчамидаги махсус цилиндр шаклидаги идишга солиб, айлантириб кўришади. Маълум бўлишича, Samsung смартфони экрани устига ётқизизлган Gorilla Glass 5 шишасининг пишиқлиги аксарият смартфонлар экранига қараганда 2 баробар мўрт экан.
Экспертларнинг хулосасига кўра, Galaxy S8 корпусининг ясси бурчаклари — флагманнинг нозик нуқтаси ва смарфтон нохос қўлдан тушиб кетган биринчи галдаёқ бу жиҳат панд бериб қўйиши мумкин. Имкон қадар, смартфонни чехол билан тутган афзал.
