Galaxy S8’га S7’га нисбатан 5,5 баробар кўп буюртма берилди
Жанубий Кореянинг Samsung компанияси ўзининг сўнгги — Galaxy S8 ҳамда S8 Plus флагман смартфонларига олдиндан буюртма олишни бошлаганидан 2 кун ўтиб 550 мингдан зиёд харидорлар ушбу моделни сотиб олиш учун аввалдан тўловни амалга оширган. Бу тўғрида Корея Республикасининг «Чосон ильбо» (Chosunilbo) газетаси хабар бермоқда.
Samsung 7 апрелдан бошлаб Galaxy S8’га аввалдан буюртма олишни бошлаган. Қайд этилишича, 2 кун ичида янги моделга берилган буюртма миқдорини Galaxy S7’нинг натижаси билан таққослаб кўрилса, Galaxy S8’га 5,5 баробар кўпроқ буюртма берилган.
Компаниянинг маълум қилишча, буюртма берганлар 18 апрелдан, яъни Galaxy S8 дўконларга расман сотувга чиқишидан аввал уни қўлларига оладилар. Уларга смартфон билан бирга, Gear 360, виртуал воқелик шлеми ва бошқа электрон қурилмалар ҳам совға сифатида берилади.
Эслатиб ўтамиз, 29 март куни Samsung тақдим қилган S8 – муваффақиятсиз Note 7 флагманидан сўнг тақдим қилган янги смартфони ромсиз дисплей ва тугмадан холи олд панели билан диққатга сазовор. Шунингдек, уни док-станция ёрдамида персонал компьютерга айлантириш мумкин. Galaxy S8 ҳамда S8 Plus смартфонлари 21 апрелдан бошлаб халқаро бозорга 950 ҳамда 1050 АҚШ долларидан сотувга чиқарилади.
