Galaxy S8’нинг бирорта iPhone’да йўқ жиҳати маълум бўлди
Кейинги ҳафтада биз жаҳоннинг энг илғор смартфони бўлиши кутилаётган Samsung Galaxy S8’нинг тақдимотига гувоҳ бўламиз. Флагман смартфон билан бир қаторда унинг имкониятларини кенгайтирадиган аксессуарлар ҳам намойиш қилинади. Улардан бири Galaxy S8’ни Android базасидаги кучли компьютерга айлантирувчи Samsung DeX Station номли кўчма станциядир. Бу ҳозирча илғор бўлган iPhone 7’да йўқ. Тўғри, бу жиҳат илк маротаба Microsoft Lumia 950 ва Lumia 950 XL гаджетларида татбиқ қилинган, уларни Windows тизимидаги экранлар билан улаш мумкин эди.
DeX Station дизайнидан букланадиган қисмга эга хоккей шайбасини эслатади. Станция устига ёпилувчи бу қисм уни смартфон билан улайди. Шунингдек қурилмадаги махсус совитиш тизими Samsung Galaxy S8’да юзага келиши мумкин бўлган қизишларнинг олдини олади. Эҳтимол, бу компания Galaxy Note 7’нинг тақдиридан олган сабоқдир.
Samsung DeX Station ёрдамида смартфонни монитор ёки телевизор, клавиатура ва сичқонча билан улаш мумкин. Смартфон станция ёрдамида дисплейга тасвирни секундига 30 та кдарга тенг 4К сиғимда узатади. Бунинг учун Samsung Android операцион тизимини йирик экранларга ҳам мослаштирувчи тизимни яратган.
Galaxy S8 DeX Station’га уланиши билан унинг процессори тўлиқ қувватда ишлай бошлайди. Док-станция тезкор заряд олиш технологиясига эга бўлиб, смартфонга ҳам қувват етказиб беради. Аксессуарда USB-C ва HDMI портлари, 2 та USB 2.0 порти, шунингдек 100 мегабитли Ethernet порти мавжуд.
Маълумотларга кўра, Samsung DeX Station 160 АҚШ доллари баҳосида сотувга чиқарилади.
