Galaxy S9 савдоси — бундан баттари бўлмайди!
Samsung Galaxy S9 тақдим қилингач, жамоатчилик уни аввалги модел каби катта қувонч билан қарши олмади. Аввалдан буюртма олиш жараёнида ҳам бу ҳақиқат намоён бўлган эди. 2018 йилнинг биринчи чорагидаги натижалар жуда паст бўлди, иккинчи чорак эса ундан ҳам пастроқ экани яқинда маълум бўлди. Бу тўғрида Корея Республикасининг The Bell интернет нашри хабар берган.
Нашр томонидан компанияга асосланиб эълон қилинган маълумотларга кўра, Samsung Galaxy S9 — компаниянинг иккинчи чоракдаги савдо кўрсаткичлари аввалги чоракдаги натижалардан паст бўлган илк флагманидир. Бундай савдо натижалари шу кунгача технологик гигант тарихида ҳеч кузатилмаган эди.
Samsung Galaxy S9 савдоси 2018 йилнинг 16 мартида бошланган эди. Илк ҳисобот даври якуни, яъни икки ҳафта ичида бренд мухлислари 10,2 миллион дона флагман смартфон харид қилишган. Бу шундай қисқа вақт учун жуда катта натижа бўлган.
Бироқ, ундан кейинги уч ойда сайёрамиз бўйлаб бор-йўғи 9 миллион дона Samsung Galaxy S9 сотилган. "Galaxy S" модели тарихида ҳали бундай паст натижа кузатилмаган эди. Таққослаш учун айтамиз, савдога чиққач, биринчи чоракда Galaxy S8 смартфонидан 2,5 млн дона сотилган бўлса, иккинчи чоракда бу смартфон 18,7 млн дона сотилган. Galaxy S7 эса илк чоракда 10,3 млн дона, иккинчи чоракда 15,6 млн дона сотилган. Galaxy S6 натижалари ҳам ёмон эмас — савдонинг илк чорагида 3,6 млн, кейинги чоракда 19,9 млн дона сотилган.
Савдонинг пастлиги Galaxy S9 моделининг Galaxy S8'га ўхшашлиги билан боғланмоқда.
Эҳтимол, жорий йилнинг 9 августида кутилаётган Samsung Galaxy Note 9 фаблетининг тақдимоти вазиятни ўзгартирар ҳамда кореялик ишлаб чиқарувчи смартфонлари савдосини яхшилар. Бироқ, аксарият экспертларнинг фикрича, вазият ўзгариши учун Samsung смартфонлар дизайнини янгилаши, янги технологияларни татбиқ қилиши лозим. Компания шу йилнинг бошида энди гаджетларида вақт синовидан ўтган технологияларни жорий қилиши, янги инновацияларни смартфонларда синаб кўришга шошмаслигини маълум қилган эди.
Эслатиб ўтамиз, Galaxy S9 5,8 дюймли, ромдан холи бўлган Super AMOLED экранлар ён томонга қайрилган дизайнда ишлаб чиқарилган ва унинг сиғими Quad HD+ (2960 × 1440 пикселли). Бу флагман маълумотларни 10 нанометрли техник жараёнда қайта ишлайдиган Qualcomm Snapdragon 845 чипида ишлайдиган жаҳондаги илк смартфон бўлгани билан ҳам ўзига хос.
Ўқинг ва нархи билан танишинг: Galaxy S9/S9+ : суперфлагманларнинг сири!
