Galaxy Z Flip 4 жонли суратларда!

Galaxy Z Flip 4 жонли суратларда!

Samsung яқин бир неча ойдан кейин ўзининг тўртинчи авлод букламафонларини тақдим қилишга тайёрланмоқда. Биз ўтган ойда уларнинг бири, Galaxy Z Flip 4'нинг компютер рендерларини кўрган эдик, бугун эса ҳали тақдим қилинмаган букламафоннинг жонли суратлари билан илк маротаба танишамиз.

TechTalkTV номли Twitter саҳифада пайдо бўлган бўлажак Galaxy Z Flip жонли суратлари олдин тарқатилган рендерлардан унчалик фарқ қилмайди ва у аввалги Galaxy Z Flip 3 билан деярли бир хил кўринишда. Қора вариантда суратга туширилган букламафон икки рангли ташқи панел: юқорисида жилоли шиша, қолган пастки қисмида эса жилосиз шишага эга.

Орқа иккилик камералари ҳам олдингидек вертикал жойлашган. Уларнинг ёнида эса кичик орқа экран мавжуд. Бундан ташқари, суратларда атрофи бироз ингичкалашган метал рамка билан ўралган қурилманинг ён томонида жойлашган бармоқ изини аниқлаш сенсорини кўришимиз мумкин.

Samsung букланадиган смартфоннинг "ошиқ-мошиқ"ларини созлаши айтилган эди, лекин бу сафар ҳам ҳеч қандай ўзгариш бўлмайдиган кўринади.

Ичкарида эса, телефон очилганида дисплейнинг букланадиган жойи бу сафар анча кўринмайдиган қилинган ва бу ундаги сезиларли ўзгаришлардан биридир. Экран юқори марказида жойлашган селфи камеранинг эса кўринмас бўлишига ҳали борга ўхшайди, Жанубий Корея компанияси ҳали ҳам тешикли олд камерадан фойдаланмоқда.

Galaxy Z Flip техник хусусиятларига келадиган бўлсак, у икки 12MP орқа ва 10MP олд камера билан келиши мумкин ва агар бу тўғри бўлса, камера сифати букламафоннинг энг кучсиз томонларидан бири бўлади. Шунингдек, қурилма 3700 mAh сиғимли батарея ва янгиланган 25W тезликда зарядланиш билан келиши миш-миш қилинаётган эди. Таққошлаш учун, Z Flip 3 3,300 mAh батареяга эга эди.

Таъкидлаш жоизки, Samsung катта эҳтимол билан иккала, Galaxy Z Fold 4 ва Galaxy Z Flip 4 букламафонларини Snapdragon 8+ Gen 1 ва кўпроқ хотира билан август ойида тақдим қилади.

ЎҚИНГ: Galaxy S22 Ultra фойдаланувчилари учун яхши янгилик