Galaxy Z Flip 4 сифатли рендерларда кўрсатилди
Жанубий Кореянинг Samsung компанияси бир неча ойлардан кейин ўзининг букланадиган смартфонлари қаторини янгилайди ва бунда биз Galaxy Z Fold ва Galaxy Z Flip тўртинчи авлодини кўрамиз. Бироқ, интернетда ҳали тақдим қилинмаган букламафонларнинг сифатли рендерлари аллақачон тарқатиб юборилди. Биз бир неча кун олдин Galaxy Z Fold 4 билан илк марта танишган бўлсак, бугун унинг "кичик укаси" Galaxy Z Flip 4 дизайни ва бир неча техник хусусиятлари ҳақида билиб оламиз.
OnLeaksбилан ҳамкорликда 91Mobiles орқали тарқатилган норасмий рендерлардан кўриш мумкинки, янги Galaxy Z Flip 4 ўзининг аввалгиси дизайнини деярли тўлиқ сақлаб қолган: икки хил рангли схема, иккилик орқа камералар ва улар ёнида кичик қўшимча дисплей, ичкарида эса юқори марказида селфи камера тирқиши билан 6.7 дюймли экран. Ягона сезиларли ўзгариш унинг ўлчамларида бўлиб, бу сафарги Z Flip ўлчами 165.1 х 71.9 х 7.2 миллиметрни ташкил қилади. Таққошлаш учун, Galaxy Z Flip 3 166 х 72.2 х 6.9 мм ўлчамда эди.
Букламафон ташқи кўриниши ўзгармаганига яраша Samsung унинг ички техник хусусиятларини кучайтириши керак бўлади. Яқинда тарқатилган миш-мишларга кўра, Galaxy Z Flip 4 кутилганидан каттароқ батареяга, 3700 mAh қувват сиғимига эга бўлиши ва у энди 15W эмас, балки, 25W тезлигида зарядланаши мумкинлиги айтилган эди. Шунингдек, Z Flip 4 ҳали тақдим қилинмаган Snapdragon 8 Gen 1 Plus чипсети билан таъминланиши кутилмоқда.
Агар барчаси режадагидек кеца, Samsung ўзининг янги авлод букламафонларини август ойи охирида тақдим қилиши мумкин.
ЎҚИНГ: Galaxy Z Fold 4 сифатли рендерларда
