Галерея: iPhone 8 нинг илк сифатли рендерлари
Шу кунларда дастурчилар HomePod прошивкасида номаълум қурилма – катта эҳтимол билан, янги iPhone’нинг график тасвирини топишга муваффақ бўлди. Apple Insider’нинг ёзишича, рендерлар ҳам ўзини кўп куттириб қўйгани йўқ ва бугун биз iPhone 8 тахминан қандай кўринишга эга бўлишига назар ташлашимиз мумкин.
WallpapersHome дизайнерлари янги iPhone’нинг қора, кумушранг ва тилларанглардаги рендерларини тайёрлади. Унда қўшкамералар iPhone 7 даги каби энига эмас, балки бўйига жойлашганини, дисплейда қарийб ҳошиялар йўқлигини, Touch ID бармоқ изи сканери эса дисплейга “қориштириб” юборилганини кўриш мумкин.
Бундан ташқари, экраннинг юқори қисмида икки камерани кўриш мумкин. Apple Insider’нинг тахминича, улардан, катта эҳтимол билан, кўз пардаси сканерида фойдаланилади. Юқори статус панели эса иккита тенг майдонга ажратилган.
Дизайнерларнинг қайд этишича, рендерлар шу кунгача сизиб чиққан кўплаб, хусусан, энг янги маълумотлар асосида тайёрланган. Шу сабабли ҳам янги iPhone 8 айнан суратлардаги каби кўринишга эга бўлиши эҳтимоли жуда катта, деб ёзади Apple Insider.
