GBoard клавиатурасининг янги версияси янада қулай чиқди
Google компанияси яқиндагина GBoard клавиатураси учун навбатдаги янгиланишни чиқарди. Энди унда матн билан ишлаш янада қулай бўлди, яна ташқи кўринишида ҳам ўзгаришлар мавжуд. Жумладан…
Жиҳозлар панели созламалари
GBoard жиҳозлар панелида клавиатуранинг қўшимча функцияларига кириш тушмачаси мавжуд. Бу функцияларга эса таржима, анимацияли расмлар қўйиш, овозли матн териш ва бошқалар киради. Энди мазкур панелнинг жойлашувини ҳамда ундаги унсурлар таркибини ўз дидингизга мослаб созлаш имконияти ҳам пайдо бўлди.
Таҳрирлаш режимига ўтиш учун учта нуқтали тасвирчага босиш керак. Эътибор беринг: сукут бўйича бу функция ўчиқ ҳолда бўлади. Жиҳозлар панелини созлаш учун аввал мазкур имкониятни созламалардан фаоллаштириш лозим.
Матн билан ишлаш учун қўшимча жиҳозлар
Агарда сиз кўпинча планшет ёки смартфонингизда матн терадиган бўлсангиз, унда клавиатуранинг мазкур янгиланиши сизни жуда хурсанд қилиши аниқ. Ниҳоят, GBoard’да курсорнинг жойлашувини бошқариш учун қулай жиҳозлар, шунингдек, матнни белгилаб олиш, нусхалаш ва жойлаш учун тегишли тугмачалар пайдо бўлди.
Мазкур унсурларни чиқариш учун сиз саҳифадаги бирор матнни белгилаб олишингиз, кейин эса жиҳозлар панелидаги – белгилаб олиш режимидаги курсор тасвирланган тугмачага босишингиз керак бўлади.
Клавиатура ўлчамларини ўзгартириш
Янгиланишда клавиатура билан битта қўлда ишлаш имкониятлари кенгайтирилди. Энди клавиатуранинг ўзини экран бўйлаб бемалол исталган жойга силжитиб кўчириб қўйиш ҳамда унинг ўлчамларини ўзгартириш мумкин. Бу дегани – тугмачаларнинг жойлашувини шундай созлашингиз мумкинки, натижада уларнинг барчаси керакли бармоғингиз етадиган ҳудудда туради!
Кичкина бўлса-да, ёқимли ўзгаришлардан яна бири – тугмачалар бурчакчалари сал доирасимон шаклга ўзгартирилган. «Соя»лари билан бу ўзгариш тугмачаларга нисбатан қабариқ кўриниш бахш этган.
Агарда сиз бета-синов дастури иштирокчиси бўлсангиз, GBoard’нинг янги версиясини Google Play каталогидан ушбу ҳавола орқали юклаб олишингиз мумкин. Бу версиянинг барча фойдаланувчилар учун тақдим этилишини эса сал кутишимизга тўғри келади.
