Gionee A1’нинг “энг яхши камерафон” бўлиши кутилмоқда
Хитойнинг Gionee компанияси MWC 2017 Жаҳон Мобиль Конгрессида ўзининг A1 ва A1 Plus флагман смартфонларини тақдим қилмоқчи. Компания ОАВ ва жамоатчилик вакилларига таклифномалар йўлламоқда. Тадбир 27 февраль куни бўлиб ўтади. Gionee A1 смартфони сурати ва унинг нарх-навоси инсайдерлар томонидан аллақачон эълон қилинган эди.
Девайс ўрта нархли смартфонлар оиласига тегишли бўлиб, унинг 8 ядроли MediaTek процессори 1,8-ГГц частота тезлигида фаолият кўрсатади. Gionee A1 экран диагонали 5,5 дюймли бўлиб, сиғими Full HD (1920 × 1080). Экран 2.5D Gorilla Glass ҳимоя шишаси билан қопланган.
Смартфон 4 Гбайт оператив хотира, 64 Гбайт доимий ички хотира, бармоқ излари сканери билан таъминланган. Смартфонда хотирани кенгайтириш имконини берадиган microSD бўлмачаси бор, у 128 Гбайт.гача бўлган карталарни қўллаб-қувватлайди.
Гаджет қувват тошининг сиғими 4010 мА·соат. “Ақлли телефон”ни тезкор қувватлаш мумкин. Алоқа воситаси янги Android 7.0 Nougat операцион тизимининг ўзлаштирилган Amigo OS талқинида ишлайди.
Унинг бош камераси сенсори 13 Мп. Олд селфи камера эса ўзини суратга олишни хуш кўрадиганларни хурсанд қилади: 16 Мп! Gionee A1 телефонидаги инфрақизил порт орқали уйдаги бошқа электроника воситаларини бошқариш мумкин.
Унинг A1 Plus талқини янада илғор жиҳат, жумладан қўш кўринишдаги бош камера ва каттароқ экранга эга бўлади. 15 мартдан сотувга чиқадиган Gionee A1’нинг нархи талқинидан келиб чиқиб 250-336 АҚШ долларини ташкил этиши кутилмоқда.
Хитойнинг Gionee Communication компаниясига 2002 йилнинг сентябрь ойида $12 миллион долларлик инвестиция билан асос солинган. $250-450 доллар нархидаги гаджетлари билан таниқли компания йилига 50 миллион дона смартфон ишлаб чиқариш салоҳиятига эга.
