«Гиперкамерали» Lenovo Z6 Pro тақдим этиляпти: барча хусусиятлари ва «жонли» видеоси
Lenovo компанияси ўзининг навбатдаги – Z6 Pro флагманини эртага, 23 апрелда намойиш этмоқчи. Шу кунга яна Meizu ҳамда Xiaomi компаниялари ҳам йирик тақдимотлар белгилашган.
Lenovo Z6 Pro’нинг асосий ўзига хосликларидан бири – «сунъий онг» тизими билан таъминланган тўрт модулли «гиперкамера»сидир. Фақат унинг модуллари аниқлиги масаласида икки хил маълумотлар бор: айримлар уларнинг 48+20+16+2 мегапикселлик, бошқалар эса 48+16+8+2 мегапикселлик оптик датчиклар эканини айтишмоқда. Бунда уларнинг охирги – 2 мегапикселлиги боке эффекти учун ажратилган ёки уч ўлчамли сканерловчи ToF-камера бўлиши кутилмоқда. Камера фоточақноғи ёнида «HyperVideo» ёзуви мавжуд; бу – янги технологиянинг маркетингдаги номи бўлиб, унинг моҳиятига тақдимотда ойдинлик киритилади.
Тизерда кўриб турганингиздек, компания Lenovo Z6 Pro’нинг нақ 100 мегапикселлик аниқликда сурат олишини таъкидламоқда. Шунингдек, ушбу флагман кранининг томчисимон «кемтиги»да жойлашган селфи-камераси ҳам кучли – 32 мегапикселлик датчикка эга. Хулласи калом, ушбу смартфон етакчи компанияларнинг камерофонларига муносиб рақиб бўляпти.
ЎҚИНГ: DxOMark рейтингида Galaxy S10 5G камералари биринчи ўринларни олиб, видео бўйича рекорд ўрнатди!
Компания мазкур флагманининг промо-видеосини расман эълон қилди, марҳамат – томоша қиламиз:
Lenovo Z6 Pro модели Snapdragon 855 процессорига, энг илғор версияда 12 гигабайтлик тезкор ва 512 гигабайтлик доимий хотирага эга. Диагоналига 6,4 дюймлик экранга, 4000 мА/соатлик аккумуляторга эга бу смартфон ZUI 11 интерфейси остидаги Android 9 операцион тизими билан чиқарилади.
ЎҚИНГ: AnTuTu’да мутлақ рекорд: Lenovo Z5 Pro GT ваъда қилинганидан ҳам ошиқ натижа кўрсатди!
