Гитлернинг телефони 243 минг долларга сотилди
АҚШда Учинчи рейх етакчисининг телефон аппарати кимошди савдосида сотилди. У 243 минг АҚШ долларига нархланди, дея хабар қилади ТАСС.
Мэриленд штатининг Чесапик-Сити шаҳридаги савдони Alexander Historical Auctions аукцион уйи ташкил этди. Телефон бунгача Буюк Британиялик ҳарбий ва сиёсатчи Ральф Рейнернинг авлодларига тегишли бўлган. Қурилманинг янги соҳиби исми эса ошкор этилмаган.
Аукцион уйидан таъкидлашларича, Германия таслим этилганидан сўнг Рейнер Берлинга борган. Ўша ерда собиқ Иттифоқ офицерлари унга фюрернинг ер ости бункерини ҳам кўрсатишган.
Ўшанда Рейнерга совға сифатида Ева Брауннинг қора телефонини таклиф этишган. Лекин Ральф Рейнер, қизил рангни хуш кўришини айтиб, фюрернинг телефонини олган.
Дискли телефоннинг корпуси қора бакелит материалидан ишланиб, қизилга бўялган, қизил сими эса тўқилган. Корпусига фюрернинг исми, шунингдек Учинчи рейх рамзи – бургут ва свастика ўйиб туширилган.
Бу қурилма Берлинда, Siemens заводида 1940 йилнинг апрелида ишлаб чиқарилган. Таъкидланишича, машъум буйруқларни беришда Гитлер айнан шу телефондан фойдаланган.
