Голографик дисплейли илк смартфон яратилди
Кейинги пайтларда янги смартфонлар
бизни аввалгидек ҳайратга солмай қўйди, сезяпсизми? Тўғри, ишлаб чиқарувчилар уларни
тобора юпқароқ, енгилроқ, камераларини кучлироқ қилишга, экрани атрофидаги
ромни имкон қадар ингичкалаштиришга уринишяпти. Бироқ буларнинг бари аввал
яратилган ечимларнинг такомиллашуви, холос. Бу борада бир неча йилдан бери инқилобий
дегулик бирор технология ихтиро қилингани йўқ.
Профессионал рақамли камералар ишлаб чиқарувчи машҳур RED компанияси айни
мана шу инқилобни амалга ошириш учун ҳам майдонга тушган кўринади. У голографик
экранли дунёдаги биринчи смартфон – RED Hydrogen One қурилмасини ишлаб
чиқараётганини маълум қилди, деб ёзади
Hi-News.ru сайти.
Hydrogen One смартфони диагонали 5,7 дюймга тенг бўлган голографик дисплей билан жиҳозланган. Бу экран анъанавий 2D-тасвирларни
кўрсатишдан ташқари, голографик контентни, 3D-контентни ҳеч бир махсус
кўзойнаксиз акс эттиради. Шунингдек, у виртуал ва тўлдирилган
реаллик контентларини
кам кўрсата билади.
Бетакрор дисплейидан ташқари, смартфонга махсус H3O алгоритми жорий этилган, у оддий стерео товушларни автоматик тарзда тўлақонли ҳажмли аудиога айлантириб беради.
Қурилма Android операцион тизими бошқаруви остида ишлайди ва, ишлаб чиқарувчининг таъкидлашича, келажакда ҳам бирор уяли алоқа операторига бириктириб
чиқарилмайди.
Афтидан, бу смартфон модулли бўлади, бироқ унинг қўшимча модуллари
ҳақида ҳозирча бирор маълумот берилмаган. Компаниянинг расмий пресс-релизида ҳам фақатгина бўлажак
гаджетнинг афзалликлари қисқача санаб ўтилган, холос.
Янги девайснинг RED камералари билан мослаштирилиши аниқ, бу эса режиссёр
ва операторларга смартфонни ўзига хос бошқарув пульти сифатида қўллаш, шунингдек,
камерада олинган тасвирларни кўриб чиқиш имконини беради.
RED Hydrogen One келгуси йилнинг биринчи чорагида савдога чиқарилади, унинг нархи ҳам аллақачон маълум. Смартфон икки хил корпусда тақдим этилади ва нархиям шундан келиб чиқади. Титан корпусли модели 1595 доллар, алюминийдан ишланган вариант эса анчагина арзон – атиги 1195 доллар туради.
