Google: “Gmail’да 99.9% спамлар блокланмоқда”

Google компаниясининг маълум қилишича, унинг Gmail почта тизимига тегишли машиналашган моделларининг спам ҳамда фишинг хатларини таниб олиш аниқлиги 99.9 фоизга етган. Яъни, ҳар мингтадан битта спам бу тизимни алдашга муваффақ бўлади. Тизим уларни билгани заҳоти ўчириб, манбаани блоклаб қўяди.

Google’нинг маълум қилишича, почта тизимида алмашилинаётган 50-70 фоиз хатларни спамлар ташкил қилади. Махсус модел Google Safe Browsing деб номланган зарарли файлларни аниқлаш тизими билан ҳам марказлашган.

Ҳаккерликнинг фишинг турига мансуб хатларини аниқлаш учун Google томонидан ихтисослашган тизим ишлаб чиқилган. Бу тизим ҳам автоматик равишда хавфсли хатларни ўчириб, блоклаб қўяди. Бу вазиятда фишинг хатларининг ўтиб кетиш имкони 0.05 фоизни ташкил қилади.

Google почта тизимига жорий қилган яна бир восита — тадбиркорларга ўз маълумотларини ҳимоялаш имконини беради. Энди тадбиркор ўзи ҳеч қачон мулоқотда бўлмаган одамга хат ёзса, Google хатни юборишдан олдин жўнатувчига буни эслатади. Шунингдек, бизнес вакиллари учун махсус филтр ҳамда ҳимоя тизимлари ишлаб чиқилган.

Шунингдек, фойдаланувчи почта орқали вирус аниқланган бирор электрон манзилга кирмоқчи бўлганда, Google фойдаланувчига зарарли манзилга киришга ҳаракат қилаётганини эслатади.