Google IO 2016: Android “ақлли соат” тизими янада такомиллашади
Смартфонларга мўлжалланган Android операцион тизимининг 7-авлоди Google IO 2016 анжуманининг бу йўналишдаги ягона ёрқин янгилиги эмас. 2016 йилда ақлли соатларга мўлжалланган Android Wear тизимининг ҳам янги талқини тақдим қилиниши кутилмоқда.
Android смартфонлари платформасига асосланган, Google’нинг ақлли соатлар ва бошқа тақиладиган қурилмаларга мўлжалланган илк тизими 2014 йилнинг мартида Motorola, Samsung, LG, HTC ва Асус компаниялари билан ҳамкорликда эълон қилинган эди.
2014 йилда Android Веар тизимида фаолият кўрсатувчи Samsung Gear Live ва LG G Watch, Asus компаниясининг ZenWatch, Motorola томонидан эса Moto 360 ақлли соатлари намойиш этилган. 2015 йилда Google ўз Android Wear тизимини iOS операцион тизими, яъни iPhone қурилмалари билан ўзаро боғлайдиган махсус мобиль иловани эълон қилди.
Огоҳлантиришлар ақлли соат тизимларининг асосий вазифасидир. Android Wear тизимида ишловчи ақлли соатлар ҳам смартфонларга қабул қилинаётган мурожаатлар – кириш хатлари, WhatsApp хатлари, фойдаланувчи тилга олинган постлар, Facebook янгиликлари, хатлар ва бошқа янгиликлар тўғрисида огоҳлантиради. Бу огоҳлантиришларни рўйхатини бошқариш ҳам мумкин. Шунингдек, зарур маҳалда соатга овозли буйруқлар бериш ҳам мумкин.
GPS тизими эса фойдаланувчининг кундалик фаолиятига оид маълумотларни қайд этиб боради. Тизим Wi-Fi технологиясига ҳам асосланади. Яъни, уйдамисиз ёки ишда ақлли соатни мобиль қурилма билан боғлаш учун Bluetooth’га ҳожат қолмайди. Ақлли соат Wi-Fi ҳудудларида тўғридан-тўғри, телефон аппаратисиз ҳам ишлайди.
Май ойида Android Wear’нинг Windows Phone қурилмаларига мўлжалланган талқинининг эълон қилиниши кутилмоқда.
Мутахассис ва экспертлар 2016 йилда ушбу операцион тизимнинг овоз бошқарувининг такомиллашуви, ишора орқали бошқариш функцияларига эга бўлиши мақсадга мувофиқ эканлигини айтишмоқда.
