Google iPhone’нинг “жонли сурат” муаммосини ҳал қилади
Google iPhone смартфонлари учун ўзининг Motion Stills номли иловасини янги талқинда эълон қилди. Дастур “Live Photos”, яъни ҳаракатдаги суратларни GIF ёки видео форматидаги файлларга айлантиради. Унинг ёрдамида айфон фойдаланувчилари муваффақиятсиз чиққан «ҳаракатли сурат»ларини таҳрир қилишлари мумкин.
Маълумки, iPhone 6s’нинг 12 мегапикселли камерасининг имконияти кенгайиб, унда ҳаракатли фотосуратлар олиш имкони жорий қилинди. “Жонли сурат” 1.5 сония мобайнидаги видео ҳамда аудио бўлиб унда тасвирга олиш тугмаси босилгунига ва босилганидан кейинги жараён муҳрланади. Натижада, 12 мегапикселли JPEG форматидаги “жонли” фотосурат ҳосил бўлади.
Бу шаклдаги суратларни iPhone 7, iPhone 7 Plus, iPhone 6s, iPhone 6s Plus ва iPhone SE’да олиш, Apple’нинг аксарият гаджетлари, жумладан Mac ва Apple Watch’да кўриш мумкин.
Аммо, бу форматни GIF ёки MOV каби оммабоп форматга айлантиришнинг иложи йўқ эди. Motion Stills иловаси энди ушбу муаммони ҳал қилади. Дастур ёрдамида “ҳаракатли сурат”ларнинг ранглари ёрқинлашиб, янада барқарор ва тиниқ суратлар олиш мумкин.
Motion Stills’даги яна янгилик — илова энди автомат равишда тасвирни таҳлил қилади ва ортиқча парчаларни кесиб ташлайди. Ундан ҳам муҳимроқ жиҳат шуки, илова ёрдамида “жонли сурат”нинг ҳар бир кадрини таҳрир қилиб, керакли жойларни олиб қолиш мумкин. Иловани ннтернетсиз ҳам ишлатиш мумкин.
Google’нинг маълум қилишича, Motion Stills сурат сифатини ошириб, қўл титраши натижасида ҳосил бўладиган хиралашишларни бартараф қилади, жараённинг энг сифатли кадрларини қолдиради.
Motion Stills’нинг янги талқинини App Store’да ушбу манзилдан бепул янгилаб олиш мумкин.
