Google компанияси Android Pay хизматини татбиқ этишни бошлади

Google компанияси Android Pay мобил тўловлар хизматини ишга туширишни бошлаганини эълон қилди. Мазкур хизмат Android операцион тизимидан мобил қурилмалар ёрдамида оддий ва хавфсиз тўловларни амалга ошириш учун мўлжалланган.

Android Pay’дан фойдаланиш учун NFC чипи билан таъминланган, Android 4.4 KitKat ёки ундан ҳам янгироқ тизимда ишлайдиган мобил қурилма керак бўлади. Сервис энг йирик тўлов тизимлари — American Express, Discover, MasterCard ва Visa’нинг кредит ва дебет карталарини қўллаб-қувватлайди.

Google’нинг мазкур янги таклифидан ҳозирча фақат АҚШда фойдаланиш мумкин. Ҳозиргача АҚШнинг энг йирик банклари ва кредит иттифоқлари — American Express, Bank of America, Discover, Navy Federal Credit Union, PNC, Regions Bank, USAA ва U.S. Bank билан ҳамкорлик йўлга қўйилган.

Тез орада ҳамкорлар рўйхати янада тўлдирилади, улар қаторига Wells Fargo, Capital One ва Citi ҳам қўшилади. Шунингдек, савдо ҳамкорлари рўйхати ҳам жуда кенг эканлиги, келажакда ҳар иккала ҳамкорлар рўйхати фаол кенгайтириб борилиши айтилмоқда.

Google’нинг қайд этишича, Android Pay сервиси нафақат қулай, балки хавфсиз ҳамдир. Ҳисоб-китоб учун бир марталик токенлардан фойдаланилади, картадаги маълумотлар эса қайта узатилмайди. Сервиснинг виртуал ҳисобрақам билан ишлаши хавфсизлик даражасини яна бир карра оширади.

Харид амалга оширилганида фойдаланувчи тўлов тасдиғини кўради, унда ҳисоб-китоб айнан қаерда амалга оширилгани ҳам кўрсатиб ўтилади. Шундай қилиб, исталган шубҳали фаолликнинг кетига тушиб, топиш мумкин. Агар смартфон йўқолса ёки ўғирланса, фойдаланувчи Android Device Manager ёрдамида қурилма фаолиятини блок қилиши мумкин.

Google Wallet’нинг амалдаги фойдаланувчилари Wallet дастури яқин орада янгиланганидан сўнг Android Pay’дан фойдаланишлари мумкин бўлади. Янги фойдаланувчилари эса Google Play’дан Android Pay’ни юклаб олишлари мумкин.

Сервисдан яқин бир неча кун ичида фойдаланиш мумкин бўлади. Хабар беришларича, AT&T, T-Mobile ва Verizon Wireless операторлари орқали сотилаётган NFC чипли барча янги Android-смартфонларга Android Pay мобил дастури олдиндан ўрнатиб қўйилади.

Google келажакда Android Pay’нинг функционал имкониятларини кенгайтириш ниятида. Масалан, мобил дастурларда тўловларни амалга ошириш имконияти — мазкур функцияни 2015 йил охирига қадар татбиқ этиш кўзда тутилган.