Google Pixel 4 расмий суратда - Iphone XI энди Google'дан ўғирланадими?!
Қидирув гиганти ўтган ойнинг бошида арзонлаштирилган Google Pixel 3a ҳамда 3a XL смартфонларини тақдим этган эди. Энди октябрнинг бошларида Google Pixel 4 туркумидаги флагманлар намойиши бўлиши кутилмоқда. Расмий тақдимотигача тўрт ой вақт бўлса-да, қурилманинг «жонли» видеосини чиқаришга ҳам улгуришганди. Энди эса компаниянинг ўзи смартфоннинг илк расмий суратини намойиш этди.
Google расмий Twitter-аккаунтида навбатдаги флагманининг суратини эълон қилган. Рендерда смартфоннинг орқа панели кўрсатилган бўлиб унинг юқори чап бурчагидан иккиталик камера, фоточақноқ ва кўмакчи датчиклардан ташкил топган квадрат модул жой олган. Пастки ўнг бурчакдан микрофон жой олганлигини таҳмин қилиш мумкин.
Корпуснинг ўнг ён томонида механик тугмачалар кўриниб турибди, пастки қисмда эса – Pixel линейкаси логотипи мавжуд. Бармоқ изи дактилоскопи катта эҳтимол билан экраннинг ўзига жойлашади. OnLeaks номи билан машхур инсайдер эса расмий тизердан келиб чиқиб смартфоннинг бус бутун ҳолати акс этган суратни улашди.
Қурилманинг ички тузилиши ҳақида маълумот берилмаган, қизиққон фойдаланувчиларга эса қурилманинг нималарга қодирлигини яна озроқ кутиш таклиф қилинган. Шунингдек, олд панел дизайни ҳам номаълум бўлиб қолмоқда, гап сўзларга қараганда Pixel 4 экранида иккиталик камера учун айлана қирқимлар очилган бўлади.
«Янада кўпроқ нарса айтиш ниятим ҳам бор эди, аммо шуни айтишим мумкинки, бу ростдан ҳам Pixel 4», — деб ёзган Google.
Google Pixel 4 ва Google Pixel 4 XL анонси октябр ойида бўлиб ўтади.
ЎҚИНГ: «Камбағалбоп» Pixel 3a XL смартфонлари тақдимотдан аввал дўконларга келди, нархлари билан танишинг!
