Google Play’да кераксиз дастурлардан қутқарувчи фильтрлар пайдо бўлди

Статистикага кўра, ўртача фойдаланувчининг смартфонида 110 га яқин илова ўрнатилган, аммо уларнинг нари борса учдан бирини ишлатади. Қолганлари шунчаки жой эгаллаб ётади, сабаби оддийгина – «Балки керак бўлиб қолар», деган ўй.

Аммо эртами-кечми, смартфон хотираси тўлиб қолади. Энди энг катта жой эгаллаган, шунингдек, энг кам ишлатиладиган иловаларни ўчириб ташламаса бўлмайди. Android учун Google Play’нинг янги функцияси айни шу ишни қулайлаштириш учун жорий этилган.

Ундан фойдаланиш учун ўз мобиль қурилмангиздаги дастурлар каталогини очинг. Иловалар ва ўйинлар жойлашган «Мои приложения и игры» бўлимига ўтинг.

Эътибор беринг, Google янги жиҳоз қўшган, у рўйхатни иловаларнинг турли параметрларига кўра саралаб кўрсатади. Шу жумладан, ҳажми ва охирги ишлатилган санасига кўра ҳам.

Дастурлар рўйхатини уларнинг ҳажмига кўра тахланг ва улардан қайсилари энг кўп жой эгаллагани кўз олдингизда намоён бўлади. Сўнгги ишга туширилганлиги бўйича фильтрни ёқинг – қайси иловалардан фойдаланмай қўйганингизни кўрасиз. Ҳар иккала белгисига кўра энг кераксизларини танлаб, ўчириб юборсангиз, смартфонингиз анчагина енгиллашади.

Бунинг учун эса рўйхатдаги ўша кераксиз илованинг номига босасиз. Дастурнинг карточкаси очилади, ундаги «Удалить» тугмачасини боссангиз бўлди.

Вақти-вақти билан шунақа тозалашни амалга ошириб турсангиз, кераксиз дастурлардан қутулган смартфонингиз сизга яхшироқ хизмат қилади.