Google саросимада: Samsung ҳам Bing томонга ўтиб кетиши мумкин
Бутун дунё ўргимчак тўрига энг зўр сунъий интеллект қобилятига эга қидирув тизимини тақдим қилиш пойгаси, эҳтимол, авжига чиқди. Microsoft'нинг Bing қидирув тизими ваниҳоят ChatGPT билан анча оммалашмоқда ва бу Google учун қора кунларни олиб келишни бошлади. Сўнгги янгиликларга қараганда энди Samsung ҳам Google'дан воз кечиб, ўзининг Galaxy қурилмаларида Bing қидирув тизимига ўтиб кетишни режалаштирмоқда. Калифорниялик компания ҳам анойилардан эмас ва у кейинги ой ўзининг сунъий интеллект билан қувватланган янги қидирув тизими воситаларини тақдим қилиш ниятида. Бу ҳақда The New York Times хабар бермоқда.
Google'нинг янги сунъий интеллект қидирув воситалари айнан қандай хусусиятларга эга бўлишини ҳозирча ноаниқ, лекин у компаниянинг ҳозирги қидирув тизимидан кўра фойдаланувчига янада кўпроқ мослаштирилган тажрибани таклиф қилиши айтилмоқда. Шунингдек, у Bard чатботи устига қурилиши эҳтимоли йўқ эмас.
Маълум бўлишича, янги функциялар "Magi" код номи остида 160 дизайнер, муҳандис ва раҳбарлар томонидан ишлаб чиқилмоқда. Улар билан янгиланган Google версияси фақат АҚШ учун эксклюзив бўлади, яъни фақат Қўшма Штатларда ишлайди (ҳозирча) ва у максимал 1 миллион фойдаланувчиларга, йил охирига бориб эса 30 миллион одамларга етказилади.
NYT берган маълумотларга кўра, Google ҳозирда Samsung уни ўзининг мобил қурилмаларида Bing билан алиштириб юборишни режалаштираётганидан ҳавотирда. Компания ишчилари бундан ўтган ой хабар топишганида "шок" ҳолатига тушишган. Таъкидлаш жоизки, Google биргина Samsung қурилмаларида бўлиш ортидан йилига 3 миллиард доллар даромад кўради, гарчи бу Apple билан келишувдаги йиллик 20 миллиар доллардан анча паст бўлса ҳам, бу компания учун катта сумма. Албатта, Samsung ҳозирда ўзининг стандарт қидирув тизимини ўзгартиришни қанчалик кучли хоҳлаётгани номаълум. Балки, Жанубий Корея компанияси Microsoft'нинг сунъий интеллект ишларидан шунчаки ҳайратлангандир. Балки, у Google'нинг айни вақтдаги кучсизлигидан фойдаланиб қолишни хоҳлаётгандир.
Google айнан қачон Magi сунъий интеллект ишларини тақдим қилиши номаълум, лекин келаётган май ойида ўтказилиши кутилаётган Google I/О тадбири уларни намойиш қилиш учун энг яхши вақт бўлиши мумкин.
(Манба: The Verge)
