Google Stadia ўйин стриминг сервиси ҳамда Stadia Controller контроллерини қарши олинг! (+видео)
Game Developers Conference 2019 анжуманида Google компанияси янги маҳсулотларини тақдим этди. Улардан бири ўтган йили Project Stream номи билан тест режимида ишга туширилган лойиҳа, иккинчиси эса контроллердир.
ЎҚИНГ: Ҳар қандай қурилма билан ишлай оладиган Google геймпадини томоша қилинг!
Шундай қилиб, қидирув гигантининг ўйин стриминг сервиси Stadia номи билан тақдим этилди. Компаниянинг таъкидлашича, Stadia сервиси сониясига 60 кадр тезлигида, HDR’ни қўллаб-қувватловчи 4K-видео билан ишлай олади. Келажакда эса бу кўрсаткичларни 8K ҳамда 120 к/сонияга етказиш режалаштирилган.
Google Stadia тақдимотига бағишланган видеороликни қуйида томоша қиламиз:
Google сўзларига кўра, Stadia анъанавий PS4 ёки Xbox One кабиларга рақобатчи бўлган янги ўйин консоли эмас. Бу – бир қатор замонавий қурилмалар, жумладан, ноутбуклар, десктоп компьютерлар, телевизорлар ва ҳатто смартфонлар билан ҳам ишлай оладиган «булутли» сервисдир. Асосий қайта ишлаш жараёни «булутлар»да амалга оширилгани сабабли, Stadia билан ишлаш учун бу гаджетларда қудратли процессор ёки графика бўлиши ҳам шарт эмас.
ЎҚИНГ: Компьютерлар учун бешта бепул «шоҳона жанг» ўйини
Шунингдек, Google мазкур тадбирда геймерлар учун янги гаджет – Stadia Controller геймпадини ҳам намойиш қилди. Wi-Fi’ни қўллаб-қувватловчи ушбу контроллер «булут»даги ўйинга ўзи боғланади. Шунингдек, у сервер билан смартфон, планшет ёки телевизор орқали эмас, балки ўзи тўғридан-тўғри уланиб ҳаракат қилади.
Stadia Controller’да ўйин сессияларини «илиб олиб», YouTube’га юклаш учун махсус тугмача ҳам мавжуд. Бундан ташқари, Google Assistant «ақлли» ёрдамчисини чақириш учун ҳам алоҳида тугмача ўрнатилган.
Google ушбу тақдимот тадбирида Stadia сервисининг Chrome браузери билан қандай ишлашини кўрсатган. Уни Chromecast орқали телевизорда, хромбукда, Chrome OS тизимли планшетда, смартфонда ва арзон компьютерда ишлатиб намойиш этишган.
ЎҚИНГ: Оммабоп пулли ўйинлардан бири iOS ва Android учун бепул чиқяпти! (+видео)
