Google етакчиси АҚШда энг кўп тўланадиган раҳбарга айланди
Google етакчиси Сундар Пичаи АҚШда энг кўп маош тўланадиган раҳбарга айланди. АҚШнинг Қимматли қоғозлар ва биржа комиссияси томонидан тақдим этилган маълумотга кўра, у жорий йилда компания акцияларидан тушган 199 миллион АҚШ доллари миқдоридаги маблағга эга бўлган.
2015 йилнинг 2 октябрида Google компаниясига эгалик қилувчи Alphabet Inc. холдинги ташкил этилгач, жаноб Пичаи компанияга раҳбар этиб тайинланган эди.
43 ёшли Сундар Пичаига жорий йилнинг 3 февраль куни Alphabet холдингининг $199 миллион долларга тенг бўлган 273,328 дона акцияси топширилган. Акциялардан тушган навбатдаги мукофот пули билан бирга Пичай нархи тахминан $650 миллион долларга тенг акциялар эгасига айланди. Бу мукофот пуллари унга 2019 йилга қадар ҳар чоракда, босқичма-босқич ўтказиб берилади.
Шунингдек, Forbes нашрининг ёзишича, Google асосчилари Ларри Пейж ҳамда Сергей Брин $34.6 млрд. ва $33.9 млрд. доллар миқдоридаги маблағга эга.
Сундар Пичаи 1972 йилда Ҳиндистоннинг Мадурай штатида, инженер-электрик хонадонида туғилган. Ҳиндистоннинг Харагпур технологиялар институти (бакалавр), АҚШнинг Стэнфорд университети (магистр), шу билан бирга Пенсильвания университетларида таҳсил олган. У компанияга 2004 йилда келиб қўшилган. Раҳбарга айлангунига қадар Google Chrome, Chrome OS, шунингдек Google Drive каби дастурий маҳсулот ва лойиҳаларнинг менежменти бўйича масъул лавозимларда фаолият кўрсатган. У компаниянинг Gmail ҳамда Google Maps лойиҳаларининг ривожига катта ҳисса қўшган.
2015 йилда Cheniere Energy энергетика компанияси раҳбари Шариф Соуки йил давомида $141,949,28 доллар даромад олиб, АҚШда энг кўп маош тўланган раҳбарга айланган.
