Ҳафтанинг смартфонларга оид қизғин фикр-мулоҳазалари
2016 йилнинг 22-25 февраль кунлари Испаниянинг Барселона шаҳрида бўлиб ўтиши режалаштирилган Жаҳон мобиль саноати ва конгрессига тобора оз фурсат қолиши муносабати билан, мобиль қурилма ишлаб чиқарувчиларининг навбатдаги маҳсулотлари тўғрисидаги қизиқарли маълумотлар, турли миш-мишлар ҳам кўпайиб бормоқда. Боиси анъанага мувофиқ, аксарият компаниялар айни шу анжуман доирасидаги кўргазмада навбатдаги қурилмаларини намойиш қилишга одатланганлар. Биз қуйида шу ҳафтада янги смартфонлар тўғрисида оммалашган, кўп муҳокама қилинаётган янгиликлар билан сизни таништирамиз.
Бу хабарларнинг ишончлилик даражасини қуйидагича баҳоладик.
?= бўлиш эҳтимоли юқори.
??= бўлиши мумкин.
???= бир нима дейиш қийин.
????= Ишониш қийин, аммо умид қилса бўлади.
?????= Ишониш қийин.
“iPhone 5se қурилмаси ҳам 6s каби тезкор ишлайди.”
Таниқли журналист, Apple маҳсулотларининг таҳлилчиси Марк Гурман жорий ҳафтада компаниянинг 4 дюймли iPhone қурилмаси ҳақида тарқаган миш-мишларга ойдинлик киритди. У 5se смартфонининг iPhone 6 каби 2014 йилнинг 9 сентябрида эълон қилинган A8 процессорига эга бўлиши билан боғлиқ хабарларни рад этиб, янги қурилма A9 процессори билан таъминланишини, унинг 16 ҳамда 64ГБ қўшимча хотирага эга талқинлари ишлаб чиқарилишини айтди. 2015 йилнинг 9 сентябрида намойиш этилган iPhone 6S ҳамда 6S Plus мобиль воситалари ушбу турдаги процессорга эга илк қурилмалардир.
Таҳлилчининг бу борадаги тахмин ва фикрлари ҳар доим тўғри чиққани ҳисобга олинса, унинг башоратига ишониш мумкин. 28 январь куни интернет нашрларида компания бу аппаратни мартнинг иккинчи ярмида намойиш этишни режалаштиргани тўғрисида хабарлар тарқалди.
Ишончлилик даражаси: ?
“HTC’нинг One M10 телефони негадир iPhone’нни эслатмоқда.”
2013 йилда тайванлик ишлаб чиқарувчи – HTC томонидан M7 смартфони тақдим қилинган эди. Бу чиндан ҳам ажойиб қурилма сифатида кўпчиликнинг эътиборини торта олди. Аммо, таассуфки шундан сўнг компания бу даражада оммалашган телефон аппаратини тақдим этишга муваффақ бўлмади. 2015 йилда HTC томонидан Жаҳон мобиль саноати ва конгрессида тақдим этилган One M9 смартфони кўпчиликка iPhone 6s’ни эслатиб юборган, бунинг учун компанияни эксперт ва мутахассислар ғояни ўғирлаганликда айблашган эди.
Жорий йилда HTC нуфузли анжуманда иштирок эта олмаслиги мумкин ва янги қурилманинг март ойида намойиш этилиши кутилмоқда. Компания унинг One M9’га ўхшашини айтган. Шу сабали HTC One M10 андроид қурилмасининг ҳам Apple флагманларига ўхшаб кетиши ҳақидаги гап-сўзлар ҳозирданоқ оммалашиб кетди.
Мобиль алоқалар ривожланиши бўйича таниқли таҳлилчи ҳисобланган Эван Бласс ҳам ўз блогида бу тахминларга заррача шубҳа қилмаслигини баён қилган.
Афтидан, HTC’нинг 2016 йилги қурилмалари дизайни унинг илҳом манбаи ҳисобланган Apple’нинг саъй-ҳаракатларига боғлиққа ўхшайди. Яна ким билади.
Ишончлилик даражаси: ???
“surfacephone.com’нинг Microsoft’га тегишлиги эканлиги тасдиғини топди.”
Microsoft компанияси Surface Phone смартфонига оид янгиликларни ёритишга ихтисослашган surfacephone.com сайтини рўйхатдан ўтказганлиги тўғрисида тарқатилган хабарлар қисман ўз тасдиғини топди. Бу ҳақда Reddit ижтимоий янгиликлар сайти ўз фойдаланувчисининг сўзларига таяниб маълум қилган. Бошқа бир манбаада қайд этилишича, бу домен компания томонидан 2007 йилда рўйхатдан ўтказиб қўйилган. Ҳозирча мазкур сайт бўм-бўш ва компания сайтининг Surface техник қўллаб-қувватлаш бўлимининг манзилига улаб қўйилган.
Компания Surface Phone қурилмасини 2016 йилда тақдим қилмоқчи. Ушбу смартфоннинг Lumia бренди ўрнини эгаллаши кутилмоқда.
Бу домендан ташқари Microsoft 67,681 та доменга эгалик қилади.
Ишончлилик даражаси: ?
“Навбатдаги Samsung Galaxy’да ташқи хотира бўлади.”
Сўнгги вақтларда компания баъзи бир гаджетларидан microSD қўшимча хотирани олиб, уларни 64ГБ, олинмайдиган ички хотирага айлантираётган эди. Натижада Samsung’нинг бу турдаги қурилмаларига бўлган қизиқиш бир оз пасайиб кетди.
Galaxy S7 ва S7 edge қурилмаларида ҳам ташқи хотиранинг бўлмаслиги билан боғлиқ миш-мишлар кўпчилик Galaxy ишқибозларини хавотирга солаётган эди. Аммо ахборот технологиялари нашрлари ишончли манбааларнинг сўнгги маълумотларига таяниб ёзишича, 2016 йилнинг февраль ойида тақдим қилиш режалаштирилган ушбу смартфонларда ажраладиган қўшимча хотира бўлади.
Galaxy S7: батафсил тавсиф.
Ишончлилик даражаси: ?
“Amazon ўзининг Fire Phone смартфонини бошқа кимдир ишлаб чиқаришини хоҳлаяпти.”
Эсингизда бўлса, 2014 йилнинг 18 июнида Amazon.com интернет дўкони томонидан ишлаб чиқилган ва ривожлантирилган Fire Phone смартфони тақдим қилинган эди. Аммо бу қурилмалар унчалик ҳам фойдаланувчилар қизиқишини уйғота олмади.
The Information интернет нашрининг ёзишича, Amazon телефон қурилмалари ишлаб чиқарувчи заводлар билан Amazon хизматлари жорий қилинган, кўриниши ва функциялари компаниянинг Fire сериясидаги гаджетларга ўхшаб кетадиган смартфонларнинг ишлаб чиқарилиши юзасидан ҳамкорлик қилмоқчи.
Amazon хизматларига бугун эҳтиёж юқори эканини инобатга олиб, унинг қурилмалари ҳам оммалашишини тахмин қилиш мумкин.
Ишончлилик даражаси: ???
“G5 батамом янги қиёфага эга бўлади.”
LG’ни сўнгги вақтларда кўп танқид қилишяпти. Лекин, унинг байроқдор-флагман смартфонларининг дизайнига гап бўлиши мумкин эмас. Айниқса, “G” сериясида чиққан смартфонларнинг қиёфаси ажойиб. Бир қарасанг, ўчириб-ёқиш тугмаси қурилма орқа қисмига кўчади ёки қурилма бир оз букри кўринишга келади. Нима бўлганда ҳам, компания дизайн масаласида фаол ва таваккал қилишдан қўрқмайди. Шунингдек, навбатдаги G5’га оид ўзгаришлар ҳақидаги миш-мишлар ҳам беҳудага эмас.
Унинг янги талқинида ҳам ажраладиган аккумулятор бўлади. Фақат қурилма орқа панелида бир оз ўзгариш кутилмоқда. Шунинг ҳисобига қурилма G4 каби ихчам кўринишга эга бўлади. Янги қиёфадаги G5 смартфонини Барселонадаги халқаро мобиль қурилмалар конгрессида кўрамиз.
