Ҳали тақдим қилинмаган Galaxy А34 ва Galaxy А54 ҳақида барчаси!

Samsung компанияси тез орада ўзининг янги авлод ўрта синф смартфонлари, Galaxy А34 ва Galaxy А54 моделларини тақдим қилиши кутилмоқда. Бутун дунё ўргимчак тўрида эса аллақачон бўлажак смартфонларга оид деярли барча маълумотлар тарқатиб юборилган.

Дизайн

Агар қалинлигида бир неча миллиметр фарқ бўлиши мумкинлигини айтмаса, бу йилги Galaxy А смартфонлари ҳам ҳар доимгидек бир хил рамка дизайнига эга бўлади: юқори модел Infinity-О, пастроқ модел эса Infinity-U рамкасида. Рендерларда Galaxy А54 рамкаси қалинлиги Galaxy А34 рамкасига қараганда бироз қалинроқ кўринади. Таъкидлаш жоизки, бу расмий рендерлар эмас.

Орқа томонда эса смартфонлар учта камерага эга. Ҳа, Samsung ўзининг бу йилги ўрта синф смартфонларидан битта камера сенсорини олиб ташламоқда. Камералар қурилма орқа томони чап юқори бурчагига вертикал равишда туширилган ва улар камера оролига эга эмас, яъни улар смартфондан бўртиб чиқиб туради. Бу Galaxy А3Х линияси учун янгилик эмас, ваҳоланки, бир неча йил аввалги Galaxy А32 шундай дизайнда фақат тўртта камера билан чиқарилган. Айтиш керакки, янги дизайнда смартфонлар яқинда тақдим қилинган бошланғич моделдаги Galaxy S23 смартфонларини эслатиб юборади.

Техник хусусиятлар

Техник хусусиятларга келадиган бўлсак, Galaxy А54 модели FHD+ резолюциясидаги 120 герц янгиланиш тезлигига эга 6.4 дюймли Super AMOLED дисплей билан жиҳозланади. Унинг юқори марказига 32 МП селфи камера ўрнатилган. Орқа томонда эса 50 МП (f/1.8) асосий, 12 МП (f/2.2) ултра-кенг ва 5 МП макро учлик камера сенсорлари жойлашган. Капот остида Exynos 1380 чипсети 8 RAM ва 256 хотирага уланган. Қурилма One UI 5.1 операцион тизимида ишлайди. Смартфоннинг 5000 мА/соат батареяси 25 Вт тезликда қувватланади. Қўшимчасига, экран остида бармоқ изини аниқлаш сканери, сув ва чангга чидамлилик учун IP67 сертификати мавжуд. Миш-мишларга кўра, смартфонга 3.5 миллиметрли наушник уяси қайтиши мумкин.

Galaxy А34 моделига келсак, смартфон юқори моделники каби экран, батарея ва хотира конфигурацияларига эга. Фақат унинг дисплейи бироз каттароқ, 6.6 дюйм. Чипсет эса MediaTek'нинг Dimensity 1080 чипсети бўлиши айтилмоқда. Қолаверса, ушбу модел 6 ГБ оператив хотира билан ҳам таклиф қилинади. унинг ўлчами 161×78×8 мм бўлиб, оғирлиги 199 граммни ташкил қилади. Тасвирга олиш борасида эса, селфилар учун 13МП камера, орқа томонда эса 48+8+5 МП камера тизими бор. Агар миш-мишлар тўғри бўлса, ушбу моделга ҳам 3.5 миллиметрли наушник уяси қайтарилади. 

Иккала смартфонлар ҳам хотирани кенгайтириш учун microSD уяси, NFC, 5G қўллаб-қувватланишига эга.

Нархлар

Galaxy А54 смартфони оқ, лайм, бинафша ва графит рангларда, Galaxy А34 эса кумуш, бинафша, лайм ва графит рангларда чиқарилиши эҳтимоли бор. Уларнинг таҳминий нархлари қуйидагича:

• Galaxy А34 5G (6 ГБ+128 ГБ): 410-430 евро
• Galaxy А34 5G (8 ГБ+256 ГБ): 470-490 евро
• Galaxy А54 5G (8 ГБ+128 ГБ): 530-550 евро
• Galaxy А54 5G (8 ГБ+256 ГБ): 590-610 евро

Смартфонлар келаётган март ойида тақдим қилиниши кутилмоқда.

ЎҚИНГ: Apple'нинг янги авлод флагман смартфонлари ранги ошкор бўлди