Ҳам айфон, ҳам айпад бўла олувчи iPhone X Fold буклама смартфони суратларда!

Кузатувчиларнинг фикрича, Samsung Galaxy Fold ҳамда Huawei Mate X қурилмаларининг тақдимоти смартфонсозликда янги даврни бошлаб берди. Аммо улардан ҳам аввал унча танилмаган хитойлик компания шунақа моделини сотувга чиқариб ҳам улгурганди.

ЎҚИНГ: Oppo ҳам ўз буклама смартфонини кўрсатди!

Ушбу трендга Apple ҳам қўшилиши керак, аммо у ўзининг букилувчи собил қурилмасини 2020 йилдагина намойиш этиши мумкин. Шунга қарамасдан, дизайнерлар унинг концептларини тақдим эта бошлашган.

Foldable News нашри буклама айфон – норасмий тарзда iPhone X Fold деб аталаётган қурилманинг уч ўлчамли модели суратларини эълон қилди. Уларни инсайдерлар маълумотлари ва турли миш-мишларга асосланган ҳолда дизайнер Рой Гилсинг (Roy Gilsing) яратган.

Samsung Galaxy Fold каби, купертиноликларнинг буклама смартфони ҳам иккита экранга эга. Улардан кичкинаси – корпус букилганида ташқи томонида қоладиган дисплей томонлари ўзаро 1:3 нисбатда. Ички томондаги – букилувчи экраннинг томонлар нисбати эса 2:3 бўлиши айтилмоқда.

Концептга кўра, iPhone X Fold моделини ярим буклаган ҳолда ҳам қўллаш мумкин бўлади. Бунда клавиатурали экранга эга митти «ноутбук» юзага келади.

Тўғри, буларнинг барчаси ҳозирча дизайнернинг фантазияси. Аммо қачондир Apple буклама мобил девайс ишлаб чиқса, мана шу кўринишда бўлиши ҳам эҳтимолдан холи эмас.

ЎҚИНГ: Қайта тирилган афсона – ишлаётган ҳолдаги буклама экранли Motorola RAZR 2019’ни видеода кўрамиз!