Ҳамёнбоп Motorola Moto G6 Play’даги ғайриоддий элемент нима экан? (+видео)
Яқиндагина Motorola’нинг янги смартфон моделлари ҳақида маълумотлар «сизиб чиқди». Жумладан, Moto G6 туркумига мансуб қурилмаларнинг айрим хусусиятлари ҳам маълум бўлди.
ЎҚИНГ: Moto Z2 Force флагмани iPhone 8’дан ҳам қимматга тушяпти
Бугун эса Moto G6 Play гаджетининг уч ўлчамли модели тасвирланган видеолавҳа тарқалмоқда. Лавҳани таниқли инсайдер @OnLeaks тақдим этганини, унинг прогнозлари одатда тўғри чиқишини инобатга олсак, Motorola’нинг ушбу ҳамёнбоп смартфони чиндан ҳам қуйидагича кўринишга эга:
Гувоҳи бўлганингиздек, Moto G6 Play экрани остида Motorola логотипи жойлашган. Дактилоскопик сканер эса, ҳозирги кўпчилик смартфонларда бўлгани каби, орқа панелдан ўрин олган.
Аммо корпуснинг орқа панелида яна бир ғайриоддий элемент бор – у камера модули ва чақноғини ўз ичига олган ҳалқа шаклида. Эҳтимол, бу билдиришонома келганидан огоҳлантирувчи ёруғлик-диодли элемент бўлиши мумкин. Яна бир жиҳати эътиборга лойиқ – камера модули корпус юзасидан туртиб чиққан эмас, балки текис юзада жойлашган.
Бундан ташқари, Moto G6 Play орқа панели шишадан ишланганлиги ҳам қизиқ. Ахир, бу – одатда симсиз қувватлаш технологияси учун қўлланадиган ечим-ку, бу смартфон эса ҳамёнбоп модел...
Манбаларнинг маълумот беришича, Moto G6 Play диагонали 5,7 дюймга, тасвир аниқлиги эса 1440х720 пикселга тенг экран билан жиҳозланган. Унинг «юраги» сифатида Snapdragon 430 процессори танланган, асосий камераси эса 12 мегапикселли. Тезкор хотираси 2 ёки 3 гигабайт, доимий хотираси эса 16 ёхуд 32 гигабайт ҳажмга эга. Шунингдек, смартфоннинг қувват тоши ҳам салмоқли – 4000 мА/соат сиғимга эга.
Moto G6 Play нархи, тақдимот санаси ва бошқа хусусиятлари ҳозирча маълум эмас. Бу борадаги янгиликлардан биринчилар қаторида бохабар бўлиб бориш учун биздан узоқлашманг.
