Ҳамёнбоп P Smart Z – камераси корпусдан чиқувчи илк Huawei смартфони расмий суратда!
Экраннинг буткул ромсизлигини таъминлаб, олд камерани корпус ичидан чиқадиган механизмга жойлаштириш смартфонсозликда трендга айланмоқда. Хитойлик техногигантнинг биринчи шундай модели эса Huawei P Smart Z деб номланаётир.
ЎҚИНГ: «Жонли» фото: Xiaomi ходими камераси корпусдан чиқувчи, SD 855 чипли Redmi флагманини «сотиб қўйди»!
Ҳали тақдим этилмасидан аввал Huawei P Smart Z смартфонининг асосий техник хусусиятлари ҳамда рендер суратлари интернетда тарқалмоқда. Уларга кўра, мазкур модел ҳамёнбоп тоифага мансуб бўлиб, тахминан 210 еврога нархланади. Унинг техник таъминоти асосини Kirin 710 платформаси ҳамда 4 гигабайтлик тезкор хотира ташкил этади. Девайснинг доимий хотираси эса 64 гигабайтлик бўлиши айтилмоқда.
Интернетда дастлаб бу гаджетнинг норасмий рендер суратлари тарқалган:
Хабарларга кўра, Huawei P Smart Z экранининг ўлчами диагоналига 6,6 дюймлик, тасвир аниқлиги эса Full HD+ форматида. Смартфоннинг бош камераси қўшалоқ – 16 ва 2 мегапикселлик модулларни ўз ичига олади ва сунъий идрок функцияларига эга. Корпуснинг юқори қиррасидан чиқувчи олд камерага ҳам селфи учун 16 мегапикселлик сенсор ўрнатилган.
ЎҚИНГ: Элликка яқин Huawei смартфони EMUI 9.1’гача янгиланяпти!
Кеча эса таниқли инсайдер Эван Бласс (Evan Blass) ушбу моделнинг биринчи расмий рендерини ҳам эълон қилди:
Гарчи Huawei P Smart Z смартфонининг дизайни ва техник жиҳатларига Эван Бласс тўхталиб ўтмаган бўлса-да, бу борада ундан аввал тарқалган хабарлар орқали маълумотларга эгамиз. Яъни, ушбу қурилманинг ўлчамлари 163,5х77,3х8,9 миллиметрга тенг, вазни эса 197 граммни ташкил этади. Хитойлик техногигант унга анчагина бақувват – 4000 мА/соатлик аккумулятор ўрнатяпти.
Сифатли расмий рендери ва батафсил маълумотлари чиқиб улгурганига қараганда, Huawei P Smart Z тез орада тақдим этилса керак. Terashop.uz интернет-дўконимизда эса аллақачон ушбу компаниянинг айрим смартфонларини 825 000 сўмдан бошланувчи нархларда сотиб олиш имкони бор.
ЎҚИНГ: Google ва Huawei бу смартфон эгаларининг ҳар бирига 400 доллардан тўлайди!
