«Ҳамёнбоп» Pixel 3a ҳамда Pixel 3a XL смартфонлари аллақачон Google сайтига чиқди!

Google компанияси Pixel 3 ва 3 XL смартфонларини тақдим этганидан сўнг кўп ўтмасдан, уларнинг нисбатан арзон версияларини ҳам тайёрлаётгани ҳақида хабарлар тарқалди. Биз унинг «жонли» суратлари ва ҳатто видеоларигача эълон қилганмиз.

ЎҚИНГ: Google’нинг «камбағалбоп» Pixel 3a смартфони Snapdragon 855 чипли Mi 9 нархида сотилади!

Бу икки модел Google Pixel 3a ҳамда Pixel 3a XL номланади ва май ойининг ўрталаридаги Google I/O кўргазмасидан кейин тақдим этилади. Шунга қарамай, улар аллақачон ишлаб чиқарувчининг расмий сайтида «кўриниш берди».

Аниқроғи, бу икки қурилма компаниянинг Google Play Console расмий сайтида пайдо бўлди, бу ресурс ёрдамида турли моделлардаги смартфонларга иловаларнинг ўрнатилиши текширилади. Pixel 3a ҳамда Pixel 3a XL моделлари ушбу сайтда Bonito ва Sargo кодли номлари билан қайд этилган.

Шундай қилиб, Google’нинг бу икки смартфони ҳам Qualcomm процессори базасида ишлайди, аммо айнан қайси чип эканлиги аниқ эмас. Иккаласи ҳам 4 гигабайтлик тезкор хотирага ва NFC моделига эга бўлиб, Android 9.0 Pie операцион тизим талқини бошқаруви остида ишлайди.

Google Pixel 3a экранининг тасвир аниқлиги 2220х1080 пикселлик бўлиб, бир дюймда 440 пиксел бўлади. Pixel 3a XL моделида эса мазкур кўрсаткичлар тегишлича 2160х1080 ва 400 пикселни ташкил этади.

ЎҚИНГ: Google яна учта маҳсулотини ўз «қабристон»ига жўнатди