Ҳамёнбоп Samsung Galaxy J4 (2018) тайёр: хусусиятлари, сурати ва видеоси!
Жанубий кореялик корпорация ҳар йили ўнлаб моделларда смартфонлар тақдим этади. Улар орасидан энг ҳамёнбопи Galaxy J туркумига мансуб телефонлар ҳисобланади.
ЎҚИНГ: «Малика»да Samsung смартфонларининг сўмдаги нархлари (2018 йил 12 январь)
Бугун интернетда Samsung тақдимотга тайёрлаётган яна бир модел – Galaxy J4 (2018) смартфони ҳақидаги маълумотлар тарқалди. Мазкур қурилма аллақачон SM-J400F модел рақами остида Geekbench бенчмаркида синовдан ўтди, шунинг эвазига унинг техник жиҳатлари маълум бўлди.
Табиийки, ҳамёнбоп нарх тоифасига мансуб бўлган Samsung Galaxy J4 (2018) техник таъминоти ҳам шунга яраша. Унга 1,4 ГГц такт частотасида ишловчи 4 ядроли Exynos 7570 процессори ўрнатилган. Мазкур «электрон юрак» икки гигабайтлик тезкор хотира билан ҳамкорликда ишлайди.
Galaxy J4 (2018) смартфони бошиданоқ Android операцион тизимининг энг янги – 8.0 Oreo талқини ўрнатилган ҳолда тақдим этилади.
Афсуски, мазкур девайс ҳақида ҳозирча шундан бошқа ишончли маълумот йўқ. Кузатувчиларнинг фикрича, Samsung Galaxy J4 (2018) металл корпусга, Wi-Fi 802.11ac, Bluetooth 5.0, A-GPS, NFC ҳамда ГЛОНАСС модулларига эга бўлади. Шунингдек, жанубий кореяликларнинг бу йилги Galaxy J туркумидаги барча моделлар сингари, Galaxy J4 (2018) ҳам USB Type-C порти билан жиҳозланиши кутилмоқда.
ЎҚИНГ: Сирли рўйхат: Samsung бу йил тақдим қиладиган смартфонлар
Ушбу смартфон жорий йилнинг май-июнь ойларида расман намойиш этилиши кутилмоқда. Ҳаваскорлар эса аллақачон унинг кўриниши ва хусусиятлари ҳақида видео тайёрлаб улгуришган. Келинг, шу лавҳани биргаликда томоша қиламиз:
Айтиб ўтиш ўринлики, Samsung компаниясининг бир нечта смартфонлари прошивкаси Android 8.0 Oreo талқинигача янгилана бошлаган.
ЎҚИНГ: Ҳозироқ Android 8.0 Oreo'га янгиланадиган смартфонлар рўйхати!
