Home24uz – электроника ва маиший буюмлар сотиладиган онлайн гипермаркет
Бугунги кунда юртимизда ҳам онлайн магазинлар сони ортиб бормоқда. Шулардан бири home24uz онлайн гипермаркети. Биз мазкур онлайн гипермаркет фоалияти билан яқинроқ танишиш учун уларнинг меҳмони бўлдик.
Kомпания ўз фаолиятини бошлаганига тўрт ой бўлди. Компания тижорат директори Ширин Мухамедова сўзларига кўра, икки йил олдин лойиҳа ишлари бошлаб юборилган. Дастлаб логотип ўйлаб топилган, сўнг фаолият мазмуни ишлаб чиқилган.
– Биз уй ва офис учун барча керакли маҳсулотларни етказиб берамиз. Бу харидорларимизга анча қулайлик яратади. Сабаби бошқа ҳолатда бизнинг онлайн гипермаркетимиздаги маҳсулотларни у дўкондан бу дўконга юриб харид қилишга тўғри келади. Бу эса анча вақтни талаб қилади. Биз ҳозирча тест режимида ишлаяпмиз. Бир ҳафтада 10 тага яқин буюртмалар бўлади. Сайтимизда 2300 дан ортиқ маҳсулотлар мавжуд. Шу фурсатдан фойдаланиб, уй ва офис жиҳозларини ишлаб чиқарувчи ташкилотларни ҳамкорликка чорлаб қоламиз. Айни кунларда ҳамкорларимиз билан шартномалар тузмоқдамиз. Сайтимизда асосан, маҳсулотларнинг расмини сифатли ва турли ракурсларда беришга ҳаракат қиламиз. Ҳар бир маҳсулотга кенгроқ, ҳар бир деталигача таъриф беришга ҳам алоҳида эътибор қаратаяпмиз, – дейди Ширин Мухамедова.
Сайтга кириб, буюртма қилишда, рўйхатдан ўтмасдан ҳам буюртма бериш мумкин. Фақат рўйхатдан ўтмаган кишининг шахсий саватчаси бўлмайди. Кейинги сафар нима буюртма қилгани кўриш учун рўйхатдан ўтган маъқул. Шахсий саватчанинг яна бир афзаллик томони шундаки, сиз масалан музлатгич олмоқчисиз, лекин солиштиришга келганда ўйланиб қолишингиз мумкин. Шундай ҳолда сиз ўзингиз ёқтирган тўрт-бешта музлатгични танлаб олиб, саватчангизга ташлайсиз ва солиштириш тугмачасини босасиз. Шунда сиз уларнинг қайси бири сизга тўғри келишини аниқлаб оласиз. Буюртмани телефон орқали ҳам амалга ошириш мумкин. Маҳсулотни етказиб беришда кичик ҳажмдаги маҳсулотлар учун 10 000 сўм ва катта ҳажмдаги маҳсулотлар учун 30 000 сўм олинади. Тўлов пластик карта ва нақд пўл йўли билан амалга оширилади. Пластик карта тўловида ҳам ҳеч қандай ўзгаришлар бўлмайди, яъни баъзи жойларда “пластикка унча, нақдга бунча” дейишганидек, бу ерда эса ундай ҳолатга дуч келмайсиз. Маҳсулот ҳозирча Тошкент шаҳри ҳудудида етказилиб берилади. Харидор уни текшириб олгандан сўнггина тўловни амалга оширади.
Компания IT соҳасида дастурчилар, веб-дизайнерларни ҳам ишга таклиф қилмоқда. Қизиқувчилар ўз резюмеларини компания электрон манзилига юбориши ёки ўзлари офисга ташриф буюришлари мумкин. Тажрибали мутахассислар учун уларнинг эшиклари ҳамиша очиқ экан. Компаниянинг келажакдаги режалари ҳақида сўраганимизда, аввало етказиб бериш хизматини бепул қилиб, маҳсулотлар хилма-хиллигини янада ошириш, click, sms-тўловларини сайтга киритиш, кейинчалик маҳсулотларини кредитга бериш масаласини ҳам ўйлаб кўришларини билдиришди.
Хуллас, бугун ҳар соҳада инсон замонавийликка интилмоқда. Шу ўринда унга хизмат кўрсатиш сифати ҳам кун сайин ўсиб бормоқда. Шу йўлни танлаб, инсонларга замонавий ва сифатли хизмат кўрсатишга бел боғлаган home24uz онлайн гипермаркетининг келажакдаги фаолиятига ривожлар тилаб, маррани катта олишларига тилакдошмиз.
