Honor 30, 30 Pro ва 30 Pro+ тақдим этилди: 424 доллардан бошланувчи 5G-флагманлар!

DiMaX
6160
16.04.2020 14:34

Huawei компаниясининг суббренди яқинда Kirin 820 чипли илк 5G-смартфон – ҳамёнбоп Honor 30S моделини тақдим этганди. Кеча – 15 апрелда эса мазкур оиланинг тўлақонли флагманлари намойиши бўлиб ўтди.

ЎҚИНГ: «Бойқуш кўзли» Honor 30 Pro илк расмий суратларда

Янги туркумга учта – Honor 30, Honor 30 Pro ҳамда Honor 30 Pro+ моделлари кирган. Улар хитойлик гигант аввалроқ тақдим қилган флагманлар – Huawei P40 оиласи вакилларининг соддалаштирилган версиялари бўлиб, Google сервисларисиз чиққан.

Honor 30: «Кичкина деманг бизни...»

Стандарт талқиндаги Honor 30 смартфонида 6.53 дюймлик OLED-дисплейнинг тасвир аниқлиги Full HD+ форматида. Экраннинг ўзига бармоқ изи сканери интеграция қилинган, юқори чап бурчагида 32 мегаписеллик олд камера тирқиши мавжуд. Дисплейда кадр янгиланиш частотаси 60 герцлик.

Honor 30 моделининг «электрон юраги» сифатида Kirin 985 процессори танланган – бу ўтган йилги Kirin 980 флагманининг бирмунча яхшиланган версиясидир. Янги чипсетда 2.56 ГГц такт частотасида ишловчи иккита Cortex-A76 ядроси, 2.40 ГГц частотали иккита Cortex-A76 ҳамда 1.78 ГГц частотали тўртта Cortex-A55 ядролари қўлланган. Процессор жамланмасига булардан ташқари Mali-G77 график чипи ҳамда «сунъий онг» учун NPU нейрон процессори ҳам киритилган.

ЎҚИНГ: Дунёдаги энг кучли смартфон, процессор ва прошивкалар ТОП-ўнталиклари (Master Lu рейтинглари, 2020 йил 1-чорак)

Huawei ушбу стандарт Honor 30 смартфонини 6/8 ГБ тезкор ҳамда 128/256 ГБ доимий хотиралар билан таклиф этади, унда яна 256 гигабайтгача ҳажмли Nano Memory форматидаги хотира картаси учун слот ҳам мавжуд.

Honor 30 асосий камераси тўртталик: 40 мегапикселлик Sony IMX600 сенсори OIS технологиясига ва f/1.8 диафрагмага эга. Иккинчи – кенг бурчакли объективли модул 8 мегапикселлик аниқликда. Учинчиси – 8 МПлик перископ линзали датчик бўлиб, барқарорлаштириш тизимига ҳамда 5 карралик оптик ва нақ 50 карралик рақамли зумга эга. Сўнгги сенсор эса 2 мегапикселлик макросъёмка модулидир.

Ушбу смартфоннинг 4000 мА/соатлик аккумулятори USB-C 2.0 порти орқали 40 ваттлик технология бўйича тезкор қувватлана олади. Honor 30 контактсиз тўловлар учун NFC чипи, Bluetooth 5.1 ва GPS интерфейслари билан ҳам таъминланган. Қурилма корпусида иккита SIM-карта уячаси мавжуд; у уяли алоқанинг LTE ҳамда 5G тармоқларини қўллаб-қувватлайди. Honor 30 энг сўнгги – Android 10 операцион тизими базасида тайёрланган Magic UI 3.1 интерфейси билан ишлайди.

ЎҚИНГ: 2019 йилнинг энг барқарор смартфонлари ва прошивкалари (Master Lu рейтинги)

Ўзаро ўхшаш фотофлагманлар – Honor 30 Pro ҳамда Honor 30 Pro+

Honor 30 Pro ҳамда унинг «плюсли» версияси стандарт Honor 30’дан фарқланса-да, ўзаро жуда ўхшаш. Уларнинг ҳар иккаласининг корпуси IP54 стандартига кўра сувдан ҳимояга эга. Бу флагманларда, кичик «ини»сидан фарқли равишда, икки ёни қайрилган OLED-дисплейлар қўлланган. Ҳар иккаловида ҳам бир хил экран: ўлчами 6.57 дюймлик, HDR10 тасвир форматини қўллаб-қувватлайди ва кадр янгиланиши 90 герцлик. Бармоқ изи сенсори ҳам дисплейнинг ўзида; яна олд камера тирқиши каттароқ, чунки Huawei бу моделларида селфи учун иккита – 32 МПлик асосий ва 8 МПлик кенг бурчакли объективга эга модул қўллаган.

Хитойлик техногигант бу иккала флагманига ўзининг энг кучли Kirin 990 5G процессорини ўрнатган. Уларда бир хилдаги 8/12 ГБлик тезкор ва 128/256 ГБлик доимий (UFS 3.0 туридаги) хотира чиплари қўлланган.

Honor 30 Pro ҳамда 30 Pro+ орасидаги фарқ уларнинг бош камера жамланмасига тегишли. Honor 30 Pro моделида асосий датчик сифатида 40 мегапикселлик Sony IMX600 сенсори қўлланган бўлса, Honor 30 Pro+ камераси 50 мегапикселлик Sony IMX700 модули билан мақтана олади. Қўшимча тасвир датчиклари эса уларда бир хил: 16 мегапикселлик кенг бурчакли модул ҳамда 8 мегапикселлик телефотокамера (5 карралик оптик ва 50 карралик рақамли зум, OIS).

Юқори талқиндаги бу икки флагман нафақат симли усулда 40 ваттлик, балки симсиз усулда 27 ваттлик тезкор қувват олишга ҳам қодир.

Энг асосийси – нархига келсак...

Huawei ҳар учала янги смартфони учун олдиндан буюртмаларни аллақачон олмоқда, маҳаллий бозорда очиқ савдога улар 21 апрелдан чиқади. Хитойда уларни қуйидаги нархларда олиш мумкин:

Honor 30 6/128 ГБ — $424

Honor 30 8/128 ГБ — $453

Honor 30 8/256 ГБ — $495

Honor 30 Pro 8/128 ГБ — $566

Honor 30 Pro 8/256 ГБ — $622

Honor 30 Pro+ 8/256 ГБ — $707

Honor 30 Pro+ 12/256 ГБ — $778

Мазкур фотофлагманларнинг жаҳон бозорига чиқиш вақти ва унда белгиланадиган нархлари хусусида ҳозирча маълумот йўқ.

Дарвоқе, ишлатилса ҳам нархини кўп йўқотмайдиган смартфонлар топ-ўнталигидаги нақ еттита ўринни айнан Huawei ва унинг Honor брендига мансуб моделлар банд этганидан хабарингиз бормиди?