Honor Magic5 Pro – DxOMark камера рейтингининг янги қиролини қарши олинг!

Muhammad Yusuf
2467
27.02.2023 23:02

Бугун Барселонадаги MWC 2023 тадбири давомида Хитойнинг таниқли Honor смартфон ишлаб чиқарувчи бренди тақдимот ўтказди ва унда ўзининг янги авлод Magic смартфонлар сериясини тақдим қилди. Қаторда иккита: Magic5 ва Magic5 Pro моделлари мавжуд бўлиб улар билан батафсил қуйида танишишингиз мумкин.

Honor Magic 5

Honor Magic 5, қатордаги бошланғич модел FHD+ пикселлар ўлчами ва 90 герц янгиланиш тезлигига эга 6.78 дюймли OLED LTPO дисплейга. У HDR10+ технологиясини қўллаб-қувватлайди ва 1100 нит максимал ёруғликка чиқа олади. Экран остида бармоқ изини аниқлаш сканери ўрнатилган.

Орқа томонга ўтадиган бўлсак, юмалоқ камера ороли ичида 54 MP асосий, 50 MP ултра-кенг ва 32 MP телефото сенсорлар жойлашган. Селфилар учун олд экран юқори марказидаги тирқишдан 12 MP селфи камера жой олган. Капотни кўтарсангиз унинг остида Snapdragon 8 Gen 2 чипсети 8 GB RAM ва 256 GB хотира билан 66 Вт тезликда қувватланадиган 5100 мА/соат батареяда ишлаётганини кўрасиз.

Honor Magic 5 Pro

Шоунинг ҳақиқий юлдузи Magic 5 Pro модели Honor'нинг бу йилги энг юқори модел смартфони ҳисобланади, шу сабаб ҳам у Snapdragon 8 Gen 2 чипсети, 12 GB RAM ва 512 GB UFS 4.0 хотира каби юқори техник хусусиятларга эга. Батарея эса 5,100 мА/с бўлиб, у 66 Вт тезликда симли, 50 Вт тезликда эса симсиз қувватланади.

Қурилма 6.81 дюймли LTPO экранга эга. У 1312×2848 пиксел резолюциясида бўлиб, максимал 1800 нит ёруғликка чиқа олади ва 2160 герц PWM частотасига эга. Ушбу икки кўрсаткичлар Galaxy S23 смартфонларига ўрнатилган E6 экранида 1750 нит ва 1920 герц эди. Албатта, дисплей 120 герц янгиланиш тезлигига эга. Ушбу экран чап юқори бурчагида худди Xiaomi Civi 2 ёхуд Xiaomi 13 Lite смартфонларида бўлгани каби узунчоқ овал шаклидаги тирқишни кўришингиз мумкин. У ерда селфи ишқибозлари учун 12 MP олд камера 3D портрет сенсор билан жойлашган.

Смартфоннинг энг ўзига хос хусусиятлари унинг орқасида, юмалоқ камера оролида ичида жойлашган. Ҳа, гап камералар ҳақида кетмоқда. Magic 5 Pro учлик камера тизимига эга. Уларнинг уччаласи ҳам 50MP: бири асосий, яна бири ултра-кенг, бошқаси эса перископ зум линзаси.

Асосий камера тасвирни оптик барқарорлаштириш хусусиятига эга бўлган f/1.6 диафрагмали 1/1.2 дюйм ўлчамидаги сенсор бўлиб, у 4 та пикселларни бирлаштириш технологиясидан фойдаланади. Ултра-кенг камера эса f/2.0 диафрагма билан 122° кўриш майдонига эга. Учинчи перископ телефото линзада эса f/3.0 диафрагма, OIS хусусиятлари билан бирга 3.5Х оптик, ҳамда, 100Х рақамли зум қобиляти мавжуд. Қолаверса, камера ороли 3D ToF модули ва мултиспектрал сенсорни ўз ичига олади.

Таъкидлаш жоизки, булар ўтган йилги Magic 4 Ultimate'нинг OIS'сиз ва катта диафрагмали сенсорларидан анча яхшиланиш ҳисобланади. Қўшимчасига, камера тизими фокус учун 3D ToF лазери, ранг ҳароратини аниқлаш учун кўп спектрли сенсори ва импулсли чироқларнинг частотаси аниқлаш сенсори билан ҳам таъминланган.

Смартфон сизга максимум 4К форматида секундига 60 кадр билан видео олиш имконини беради. Гарчи Galaxy S23 Ultra ёки Xiaomi 13 Pro каби 8К форматида видеога олиш имконига эга бўлмаса ҳам, Honor Magic 5 Pro смартфони сунъий интеллектга эга режим билан аллақачон Гиннеснинг рекордлар китобига киритилган: у баскетбол тўпини оёқлар орасидан ҳавода олиб ўтиб, уни саватга ташлашни миллисекундлик тезликда тасвирга олган.

Энг қизиғи Magic 5 Pro тақдим қилиниши биланоқ DxOMark веб-сайти дунёдаги топ 10 энг яхши камерали смартфонлар рўйхатини янгилади ва унда Honor'нинг янги флагмани 152 балл билан биринчи ўринни эгаллаган. Топ 10 рўйхатда сиз iPhone 14 Pro Мах, Galaxy S23 Ultra каби бугунги куннинг элита смартфонларини кўришингиз мумкин.

Magic 5 Pro келмасидан аввал, Huawei'нинг Mate 50 Pro (147 балл) ушбу рейтингнинг биринчи ўринида турган эди. Айтиш керакки, Honor'нинг ўтган йилги флагмани Magic 4 Ultimate ҳам намойиш қилиниши биланоқ ушбу рейтингда биринчи ўринни олган эди. Ҳозир уни тўртинчи ўринда, Google'нинг Pixel 7 Pro смартфонидан кейинги ўринда кўришингиз мумкин.

Уланиш борасида Magic 5 Pro смартфони Wi-Fi ва Bluetooth учун мустақил антенна архитектурасидан фойдаланган илк смартфон бўлиб, бу Wi-Fi 6 ишлашини 200% гача ошириши ва кечикишни 30% гача камайтиради. Қўшимчасига смартфон IP68 ҳимоя сертификатига эга. Смартфонга DTS:X Ultra билан стерео динамиклар ҳам ўрнатилган.

Иккала моделлар ҳам Android 13 га асосланган MagicOS 7.1 операцион тизимида ишлайди. Ҳа, айтганча уларнинг иккови ҳам ён томонлари эгилган дисплейга эга. Дизайн борасида Pro модел оддийсига қараганда камера оролида кўпроқ сенсорларга эга эканлиги ва селфи камера тирқиши билан оддийсидан фарқ қилади.