HP Spectre: дунёдаги энг юпқа ноутбук
Бугунги кунда Apple портатив компьютерлар сегментида бош ислоҳотчи сифатида ўзининг нуфузини яхшигина мустаҳкамлаганига қарамасдан, рақобатчилари ҳам жим қараб туришгани йўқ. HP компанияси дунёдаги энг юпқа ноутбук мақоми учун курашадиган 13,3 дюймли HP Spectre портатив компьютерини тақдим этди. Алюмин корпусли, пастки қисми эса мустаҳкам ва енгил углерод толасидан тайёрланган ноутбукнинг қалинлиги 10,4 мм ни ташкил этади. Мазкур кўрсаткич билан у Apple MacBook (13.2 мм) ва Dell XPS 13 (15.2 мм)ни ҳам ортда қолдиради. Вазни эса 1,1 кг атрофида.
Ноутбукда Core M туркумидаги энергиясамарадор процессорлар ўрнига янада кучли Core i5-6200U ва Core i7-6500U чиплари қўлланилган. Қизиш муаммосини компания совуқ ҳавони корпус ичига йўналтириб турадиган янгича совутиш тизими ҳисобига ҳал этишга қарор қилди. Бунда иссиқ ҳавони янада самаралироқ чиқариш учун босим кучайтирилади.
13,3 дюймли IPS-дисплейнинг ёруғлик қамрови Adobe RGB кенглигининг 72 фоизини ташкил этади, Coring Gorilla Glass 4 шишаси эса экранни турли майда қирилишлардан ҳимоялайди.
Full HD-панель (1920×1080) сенсор тизимига эга эмас. Алоҳида қайд этиш жоизки, ўзига хос ошиқ-мошиқ механизми экраннинг енгил очилиб-ёпилишини таъминлайди. Қопқоқнинг юқори қисмида ишлаб чиқарувчининг қимматбаҳо қурилмалари учун тайёрлаган янги талқиндаги савдо белгиси тасвирланган. Клавиатураси эса ўзидан нур таратади.
Ноутбукка 256 Гб ёки 512 Гб ли PCIe SSD қаттиқ диски жойлаштирилади. HP Spectre`га USB Type-C портидан уч дона ўрнатиш режалаштирилган бўлиб, уларнинг иккитаси Thunderbolt 3 технологияси билан бирлаштирилган ҳамда тармоқдан узилган вақтларда бўш туради. Овоз чиқариш учун Bang & Olufsen`дан карнайлари қўлланилган. Автоном ишлаш вақти 9,5 соатни ташкил этади.
АҚШда HP Spectre`га буюртмалар 25 апрелдан бошланади, ноутбук нархи эса 1170 доллардан бошланади.
Манба: HP
