Huawei аллақачон Android кушандаси – HongMeng тизимли миллионта смартфон сотиб улгурган!
АҚШ санкциялари сабабли кўплаб компаниялар хитойлик техногигант билан ҳамкорликни тўхтатди. Гарчи смартфонлари Android тизимидан, ўзининг Kirin процессорларидан, хотира чипларидан ажраладиган бўлиб турган эса-да, Huawei бу муаммоларни аввалдан пайқаган ва чораларини кўриб қўйган.
ЎҚИНГ: Android рақиби – Ark OS (ёки HongMeng) тизимли Huawei Mate 30 флагманлари 22 сентябрдаёқ чиқади!
Rosenblatt Securities таҳлил фирмаси берган маълумотларга кўра, Huawei компанияси HongMeng операцион тизими ўрнатилган миллионтача смартфонини аллақачон Хитойда сотишга улгурган. Бу – хитойлик техногигантнинг ўзи ишлаб чиққан операцион тизим бўлиб, унда Android учун ишлаб чиқилган илова ҳамда ўйинлар ҳам ишлайверади.
Хабарга кўра, мазкур операцион тизим платформаси Хитойда 2019 йилнинг охиригача фойдаланувчиларга тўлиқ топширилади. Тизимнинг халқаро версияси эса 2020 йилнинг ўрталарида тайёр бўлади.
Huawei компанияси HongMeng савдо белгисини Хитой, Канада, Жанубий Корея, Мексика ҳамда Евроиттифоқда патентлаштирган. Хитойчадан ўгирганда бу сўз «алвон орзу», «қизил орзу» маъносини беради.
Компания ушбу операцион тизимни халқаро бозорга бошқа ном остида тақдим этиши ҳам мумкин. Эҳтимолий номлар орасида Ark OS ҳамда Oak OS вариантлари мавжуд.
ЎҚИНГ: Huawei смартфонларига ўрнатилувчи Hongmeng (ёки Ark OS) операцион тизимининг илк скриншотлари!
