Huawei Android 7.0 Nougat‘га янгиланадиган қурилмалар рўйхатини эълон қилди
Sony, Samsung. HTC ва бошқа бир нечта смартфон ишлаб чиқарувчилар ўз бренди остидаги қурилмаларни Android 7.0 Nougat версиясига янгиламоқдалар ёки уларнинг янгиланиш муддатларини эълон қилмоқдалар. Смартфон савдоси бўйича дунёда учинчи ўринда турадиган Huawei компанияси ҳам бу борада орқада эмас. Куни кеча хитойлик гигант EMUI 5.0 интерфейси билан бирга Android 7.0 Nougat версиясига янгиланадиган қурилмалар рўйхатини оммалаштирди.
Phonearena сайтининг маълум қилишича, рўйхатда келтирилган барча қурилмалар 2017 йилнинг 1 чорагида Android 7.0 Nougat версиясига янгиланадилар. Биринчи бўлиб Huawei Mate 8 ва Huawei P9 флагманлари навбатдаги Android версиясига янгиланиши кутилмоқда.
Қуйида Android 7.0 Nougat версиясига янгиланадиган моделлар келтирилган:
- Huawei Mate 8
- Huawei P9
- Huawei P9 Plus
- Huawei P9 lite
- Huawei Nova
- Huawei Nova Plus
Ҳозирча Хитой компанияси айнан юқоридаги моделларни навбатдаги Android версияга янгилашни режалаштирган. 2017 йилда Huawei бошқа смартфонлар учун ҳам Android 7.0 Nougat дастурини чиқариши мумкин. Лекин ҳозирча уларнинг номи маълум эмас.
