Huawei директори инновацион смартфон ишқибозларини кузгача сабр қилишга чақирмоқда
Huawei компанияси Google’нинг янги DaydreamVR – виртуал саёҳат платформасини қўллаб-қувватлайдиган илк смартфонни ишлаб чиқаришни режа қилмоқда.
Бу ҳақда Huawei директори Ричард Ю Американинг Wall Street Journal нашрига маълум қилган. Компания раҳбарининг айтишича, қурилма жорий йилнинг кузида намойиш қилинади. Компания директори ҳозирги смартфонлар виртуал воқелик технологиясига мўлжалланмаганини айтиб, бу технология ишқибозларидан смартфон сотиб олишга шошмасликни, яна бир неча ой сабр қилишларини сўрамоқда.
Google’нинг онлайн саёҳат қилиш платформасининг талабларига асосланадиган бўлсак, Huawei’нинг ушбу гаджети кучли процессор, бир қатор замонавий датчиклар ва аниқ-тиниқ намойиш учун юқори даражадаги пиксель зичлигига эга бўлади. Шунингдек, компания кенг имкониятли камераларни ишлаб чиқариш бўйича Германиянинг Leica компанияси билан 5 йиллик ҳамкорлик шартномасини имзолаган.
Шу билан бирга, Samsung, HTC, LG, Xiaomi, ZTE, Asus, ҳамда Alcatel компаниялари Google Daydream виртуал воқелик платформасини қўллаб-қувватлайдиган смартфонларни ишлаб чиқаришади.
Маълумот учун айтамиз, виртуал воқелик назарияси 1938 йилда илгари сурилган бўлиб, уни 21 асрга келибгина амалда татбиқ этишга эришилмоқда.
Виртуал воқелик технологияси датчик ва сенсорлар ёрдамида смартфон ёки махсус дисплейда бирор реал воқеликни – муҳитнинг прототипини яратиш ва фойдаланувчига бу муҳит билан алоқага киришиш, мисол учун тегиб кўриш, мулоқот қилиш, ҳис қилиш каби имкониятларни яратиб беради.
