Huawei кутилмаганда P20 Lite смартфонини тақдим этди
Хитойлик етакчи смартфонсоз ўзининг Huawei P20 Lite русумли қурилмасини 20 март куни тақдим этилиши кутилаётган эди. Лекин компания кутилмаганда бу смартфонини ундан ҳам аввал, тағин ортиқча шов-шувларсиз расман намойиш этди.
ЎҚИНГ: 20 мартдаёқ тақдим этиладиган Huawei P20 Lite учун олдиндан буюртма бериш бошланди («жонли» видео)
Huawei P20 Lite корпуси металл ромли, орқа қопқоғи эса шишадан ишланган. Хитойлик техногигант iPhone X дизайнидан илҳом олгани кўриниб турибди – дисплейнинг тепасида «ўйиқ» бор, бош камера модуллари тикка жойлашган. P20 Lite экранининг ўлчами – диагоналига 5,84 дюйм, лекин томонларининг ўзаро нисбати ғайриоддий – 19:9 га тенг. Дисплейнинг тавир аниқлиги эса 1080х2280 пикселни ташкил этади. Дактилоскопик сканер корпуснинг орқа панелидан ўрин олган.
Қўш модулли камера 16 ва 2 мегапикселли иккита объективни ўз ичига олган. Анъанавий тарзда, буларнинг иккинчиси боке эффекти, яъни орқа фонни хиралаштириб суратга тушириш учун қўлланади.
Huawei P20 Lite уч хил: қора, кўк ва пушти рангли корпусларда етказиб берилади. Ушбу смартфон Европада 1 апрелдан савдога чиқарилади, унинг нархи 369 еврога тенг, бу тахминан 474 АҚШ долларига тўғри келади.
ЎҚИНГ: Ҳали тақдим этилмаган Huawei P20 бенчмаркда Galaxy S9 ва Xperia XZ2 билан беллашди
Huawei P20 Lite асосий хусусиятлари қуйидагича:
- Дисплей: 5,84 дюймли, Full HD+;
- Процессор: Kirin 659 чипи: 2,36 ГГц.лик 4 та Cortex-A53 ядроси ва 1,7 ГГц.лик 4 та Cortex-A53 ядроси;
- График тезлатгич: MaliT830-MP2;
- Хотира: 4 ГБ тезкор, 64 ГБ доимий + 256 ГБ.гача microSD қўйиш мумкин;
- Камера: асосий камера – 16+2 МП, олд камера – 16 МП;
- Аккумулятор: 3000 мА/соат;
- Тизим: Android 8.0 Oreo асосидаги EMUI 8.0.
Huawei бу моделни жимгина тақдим этганига қараганда, у асосий эътиборни P20 ҳамда P20 Pro флагманларига қаратмоқчи. 27 март куни Парижда намойиш қилинадиган ушбу икки смартфон ёнида яна битта модел ҳам бўлиши ҳақида гап-сўзлар юрибди. Воқеалар ривожини биз билан бирга кузатинг.
ЎҚИНГ: Huawei P20 туркумидаги тўртинчиси энг қиммат смартфон бўлади!
