Huawei’нинг нияти жиддий: у Mi Band 3 «кушанда»сини тайёрлади!

Тақилувчи гаджетлар борасида энг сўнгги ва илғор моделлардан бири, шубҳасиз, Mi Band 3 смарт-браслетидир. Xiaomi уни май ойининг сўнгида, ўзининг юбилей флагманлар туркуми тақдим этилган тадбирда намойиш қилганди.

ЎҚИНГ: Миллионлаб инсонлар кутган Mi Band 3 тақдим қилинди

Аммо бу йўналишда «хитойча Apple»нинг етакчилигига яқин орада чек қўйиладиган кўринади. Зеро, унинг ватандоши – Huawei компанияси Honor Band 4 русумли «ақлли» билагузугини тайёрлаганини маълум қилди.

Хитойлик техногигант бу ҳақда Weibo ижтимоий тармоғидаги ўзининг расмий блоги орқали эълон қилган. Унга кўра, Honor Band 4 смарт-билагузугининг расмий тақдимоти 5 сентябрда Сиань шаҳрида бўлиб ўтади.

Honor Band 4’ни икки хил – оддий ва «Running Edition» номли спорт версияларида харид қилиш имкони бўлади. Шу иккинчиси бетакрор хусусиятга эга бўлиши – GPS модули билан ҳам таъминланиши кутилмоқда. Шунингдек, Honor Band 4 Running Edition нафақат қўлга, балки оёққа ёки кийим устидан ҳам тақилишга мосланади. Зеро, қиш кунлари фитнес-браслет қалин кийимлар остида қолиб кетса, унга қараш ноқулайлик туғдириши табиий.

ЎҚИНГ: Mi Band 3 «кушандаси» сотувга чиқди!

Ҳар иккала модификациядаги Honor Band 4 билагузуги ҳам NFC модули билан таъминланади. IP68 стандартига кўра ҳимояланган мазкур гаджет 50 метргача сув остига шўнғиганда ҳам ишлайверади. Булардан ташқари, мазкур трекер сенсор экранга ҳамда амалларни тасдиқлаш учун махсус тугмачага ҳам эга бўлиши кутилмоқда.

Умуман олганда, ушбу девайс Xiaomi Mi Band 3 «кушандаси» тарзида майдонга тушади. Кузатувчилар унинг нархи 45 АҚШ долларигача бўлишини айтишмоқда – аниғини энди келаси ҳафтадаёқ билиб оламиз, биздан узоқлашманг.

ЎҚИНГ: Xiaomi Mi Band 3 сотувга чиқди – барча хусусиятларини билиб олинг ва унга буюртма беринг!