IFA-2016: Alcatel автоном VR-шлемни тақдим қилди
Айни вақтда саноатда мавжуд виртуал реаллик шлемлари икки хил тоифага бўлинади: Oculus Rift ёки HTC Vive каби шлемлар компьютерга уланган ҳолда ишлатилса, Samsung Gear VR ёки Google Cardboard шлемлари смартфон билан бирга қўлланилади.
Айни пайтда Берлинда ўтказилаётган IFA-2016 кўргазмасида TCL Communication компанияси Alcatel Vision бренди остида компьютер ва смартфонга уланмасдан автоном режимда ишлайдиган VR-шлемни намойиш қилди. Шлем тармоққа уланиш учун LTE ва Wi-Fi модулларига эга, шунингдек, Bluetooth алоқасини ҳам қўллаб-қувватлайди.
Alcatel Vision шлемига ҳар бири 3,8 дюйм бўлган Full HD аниқлигидаги иккита AMOLED экран ўрнатилган, қурилма 3 ГБ тезкор ва 32 ГБ доимий хотирага эга. Бундан ташқари, акселерометр, гироскоп ва яқинлик сенсори билан таъминланган. Аккумулятор сиғими -3200 мА/ст. Гаджетдан фойдаланиш қулай бўлиши учун батареяни шлемнинг орқа тарафига ўрнатишган. Автоном ишлаш вақти 3 соатни ташкил этади.
Alcatel Vision шлемининг намойиш бурчаги – 120˚, тўхтатиш коэффициенти – 20 мс. Ишлаб чиқарувчининг таъкидлашича, ҳар иккала бирлик айни вақтда шлемлар бозоридаги юқори кўрсаткич ҳисобланади. Шлем Android операцион тизимида ишлайди.
TCL компанияси шлемнинг ташқи дизайнини янада кучайтиришини маълум қилган. Alcatel Vision шу йилнинг 4-чорагида Хитойда сотувга чиқарилади. Тахминий нархи – 500-600 доллар.