iFixit рейтинги: 2019 йилнинг энг таъмирга яроқли ва яроқсиз гаджетлари (+видео)
Рақамли электротехника қурилмаларининг таъмирга яроқлилигини баҳолашга мўлжалланган iFixit лабораторияси ҳақида эшитгансиз. Унинг турли қурилмаларни очиб кўрсатганлиги ҳақида бир қатор хабарлар эълон қилганмиз.
ЎҚИНГ: ЭКСКЛЮЗИВ ВИДЕО: iPhone XS’ни очиб кўришди – ҳаммасидан ҳам аккумулятори антиқа экан!
iFixit ўтган йилнинг якунларини видеоролик форматида эълон қилди – унда 2019 йили тақдим этилган турли оригинал гаджетлар бўйича хулосалар берилган. Компания экспертлари очиб таъмирлаш энг осон бўлган девайслар ҳамда энг ремонт қилиб бўлмайдиган қурилмаларни айтишган.
Осон созланадиган гаджетлар рейтингида ўтган йилнинг августида намойиш этилган Fairphone 3 русумли смартфон етакчилик қилган. Модулли конструкцияси туфайли уни ҳатто уй шароитида ҳам қисмларга осонгина ажратиш мумкин, қисмларини эса техникадан салгина хабари бор бўлган исталган киши алмаштира олади. Хуллас, ўн баллик iFixit ремонтга яроқлилик шкаласи бўйича у максимал – 10 балл олган.
ЎҚИНГ: Meizu 16’ни бузиб кўрамиз: хўш, хитойлик флагман ўзида нималарни яширмоқда?
Таъмирга яроқлилик бўйича иккинчи ўрин Apple ўтган йили тақдим этган, ўзиям нақ битта уй нархидаги десктоп компьютер – Mac Pro (2019) моделига насиб этган. Компаниянинг бошқа қурилмалари орасида у максимал содда компоновкаси билан ажралиб туради, унинг «ички дунёси»га кириш учун махсус жиҳозлар талаб этилмайди. iFixit мутахассислари унга ремонтга яроқлилик бўйича 10 баллик тизимда 9 балл беришган. Кучли учталикни эса Xbox One S All Digital Edition ўйин консоли 8 балл билан якунлаб турибди.
Энг таъмирлаб бўлмайдиган девайс ҳам Apple корпорациясига тегишли – AirPods Pro бу шкалада... 0 балл олган! Ҳолбуки, купертиноликларнинг энг кўп сотилаётган гаджети айфон ёки компьютер эмас, балки айнан буткул симсиз қулоқчинларидир!
«Тишланган олмали» компаниянинг 16 дюймлик Apple MacBook Pro (2019) ноутбуки бу рейтингда 1 балл, Samsung Galaxy Fold букламафони эса 2 балл билан бу «яроқсиз учталик»ка кирган.
iFixit экспертлари Microsoft Surface Laptop 3 ноутбукини алоҳида таъкидлашган – гарчи атиги 5 балл олган бўлса-да, мазкур туркумдаги таъмирлаб бўладиган илк қурилма экан.
ЎҚИНГ: Ўн йилликнинг энг муҳим юзта гаджети рейтинги: етакчи – салкам ўн йиллик смартфон!
