ИИВ: электрон прописка бўлмайди
Бир неча кун муқаддам Ягона интерактив давлат хизматлари порталида доимий пропискадан ўтиш учун аризаларни электрон шаклда юбориш мумкинлиги тўғрисидаги хабар пайдо бўлган эди. Мазкур янгилик электрон нашрларда кенг тарқалиб, халқ томонидан илиқ қарши олинди. Бироқ орадан маълум муддат ўтиб, хабар матни ўзгартирилди ва эндиликда фуқаролар ушбу хизмат ёрдамида фақатгина доимий ёки вақтинчалик рўйхатдан ўтишда зарур бўладиган ҳужжатлар намуналарини олиш имконига эга бўлишди.
Ўзбекистон Республикаси Ички ишлар вазирлиги ҳам ушбу хабарни инкор этиб чиқди. Sputnik агентлигининг хабар беришича, айни пайтда айни пайтда кимнинг айбдор эканини топиш имконсиз — “Электрон ҳукумат”ни ривожлантириш маркази ходимларими ёки ҳуқуқ-тартибот органлари вакилларими? Ҳар ҳолда, одамларнинг пропискани онлайн тарзда олишга бўлган истаги нақадар юқори экани ойдинлашиб қолди.
Шу муносабат билан Sputnik мухбири Ички ишлар вазирлигига мурожаат қилди. Унга фуқаролар прописка олиш ёки рўйхатдан чиқиш учун шахсан ИИББнинг кириш-чиқиш ва фуқароликни расмийлаштириш ҳудудий бўлимларига шахсан боришлари лозимлигини маълум қилишган. Янги тақдим этилган электрон хизмат эса шунчаки бошқа ҳужжатлар билан мазкур бўлимларга топширилиши керак бўлган қайдномани тақдим этади.
