Илк 5G тижорат тармоғи унчалик ҳам ҳалол эмас экан
1 октябр куни Американинг Verizon оператори дунёдаги илк 5G тижорат тармоғини ишга туширгани ҳақда маълум қилганди. Ўшанда, тўртта шаҳар аҳолиси уйдаги симли интернетини бешинчи авлод симсиз мобил алоқага ўтказиши мумкинлиги айтилган эди.
The Verge сайти нима учун Verizon йўлга қўйган 5G алоқаси у қадар ҳалол эмаслиги ҳақида сўзлаб берди.
Биринчи тижорат тармоғи ҳисобланган 5G Verizon компаниясининг ўзиники бўлган 5G TF стандарти бўйича ишлайди. Бу вақтда дунёдаги барча провайдерлар умумқабул қилинган 5G NR стандарти бўйича фаолият олиб боради. Кўриниб турибдики, Verizon ҳақиқий 5G технологиясининг фақат бир қисмидан фойдаланади, бу миллиметрли радиотўлқинлар, қолганида тармоқ бошқа тамойилда ишлайди. Ҳатто Verizon компаниясининг ўзида ҳам келгусида умумқабул қилинган 5G NR стандартига ўтишини таъкидлашмоқда.
ЎҚИНГ:Японияда 2020 йилга келиб 5G мобиль алоқаси ишга тушади
Рақобатчи T-Mobile оператори бош директори Джон Леже Verizon компаниясини очиқчасига танқид қилди. У ўзининг твитида Verizon раҳбариятига киноя аралаш табрик йўллади. Табрикда 5G хабари ноҳалол рекламалардан олинган юлдузчалар ва кўчирмалар билан белгилаб қўйилган. Шу йўл билан у 5G-тармоғини чала деб баҳолаган.
Verizon’нинг ўзи эса ўзининг илк тармоғи ҳисобланган 5G’ни кенгайтиришнинг имкони йўқлигини тан олган. Келгусида барча ускуналарни умумқабул қилинган 5G NR стандартларига тўғри келадиган ускуналарига тўлиқ алмаштиришга тўғри келади. Бироқ улар 5G ускуналарига ўтишнинг тахминий муддатини ҳозирча айтмаяпти.
Verizon вакили Эд Чан (Ed Chan) нинг тушунтиришича, улар ўзларининг 5G TF технологиясини ишлатишига 3GPP ассоциацияси умумқабул қилинган 5G NR стандартини жуда секин ривожлантиргани сабаб бўлган. Эд Чаннинг фикрича, уларнинг ҳаракати билан 5G NR стандарти бир ярим йилга тезлашган.
Verizon операторининг фикрича, улар дунёда биринчи бўлиб 5G тармоғини ишга туширди. Расман, шундай, улар янги технология ва янада тез радиотўлқиндан фойдаланмоқда. Моҳиятан, бу янги авлоддаги мобил алоқа ҳисобланади. Аммо уларнинг тармоғи умумқабул қилинган 5G NR стандартидан четлашган ва фақат уй интернетида фойдаланиш мумкин.
ЎҚИНГ:Мобил операторларнинг чексиз интернет тарифлари ва 5G технологияси Wi-Fi’ни сиқиб чиқаради
Verizon’нинг ушбу қадамини кўпроқ ўзининг нуфузини ошириш мақсадида атай ўйлаб қилинган пиар юришга ўхшатишмоқда. Улар биринчи бўлиш учун умумий 5G стандартидан атай чекинган. Компаниянинг ўзи бундан даромад олиши қийин, чунки кейинчалик тармоқни барибир янги ускуналарга мослаштиришга тўғри келади, бу эса қимматга тушади.
