Илк iPhone'ни рақиблар қандай майна қилгани ва йўқликка равона бўлишгани ҳақида
Илк iPhone смартфони эълон қилинганида мобил алоқа бозорини "эгаллаб олган" йирик телефон брендлари бу янгиликни киноя ва заҳарханда билан қарши олишган.
Гап шундаки, улар Apple смартфонига жиддий баҳо беришмаган ва унинг ишлаб чиқарувчиси тез орада инқирозга юз тутишига шубҳа қилишмаган. Аслида эса ...
2007 йилдаги илк iPhone баҳсли эди …
Бирор бир йирик мобил алоқа воситалари ишлаб чиқарувчилари 2007 йилда iPhone'нинг тақдим этилганини фавқулодда воқеа деб ҳисобламаган. Бу смартфон қиммат ва уларнинг наздида "бемаза" эди.
Гарчи, илк iPhone смартфон оламига илк сенсор экран билан кириб келган бўлса ҳам, ҳали кўпчилик бу инновацияни ҳазм қила олмас эди. Қолаверса, кучсиз камера ва арзимас функциялар учун Apple гаджетига катта нарх қўйган эди. Стив Жобс эса инновацион ғоялари ўзини оқлашига қаттиқ ишонар эди.
Microsoft: «Ишга яроқсиз энг қиммат телефон».
2007 йилда Microsoft компанияси бош директори бўлган Стив Балмер илк iPhone девайсини ана шу сўзлар билан қарши олди. Унинг энг катта хатоси ҳам бу смартфонни рад қилгани билан боғлиқ эди. Кўп ўтмасдан Microsoft айфонни хушламаган бу раҳбардан воз кечади. Microsoft бугун Office дастурини iPhone фойдаланувчилари орасида кенг тарқатишдан манфаатдор.
BlackBerry: «Смартфон бозорида битта шу етмай турган эди».
Жим Балсилл, компания бош директори айфонни ана шу сўзлар билан қарши олган. Бугун BlackBerry деярли йўқликка равона бўлганини барчамиз яхши биламиз.
Nokia: «Биздан воз кечиш учун арзирли сабаб йўқ».
Nokia компанияси бош директорининг бу сўзлари, эҳтимол, компанияни нотўғри ривожланиш йўлига ва йўқликка бошлаган бўлса ажаб эмас.
…муаммо ҳар бир iPhone'да етарли бўлган…
Ҳар бир iPhone камчиликдан холи бўлмаган: 4-айфонда мобил алоқа оператори сигналини тутишга қийналган, 5-айфонда минг эҳтиёт қилсангиз ҳам, корпус ранги ўчиб кетган, 6-айфон қайишқоқ бўлган.
Шундай бўлса ҳам, бу айфонлар тобора оммалашишдан тўхтамаган. Натижада, Apple рақобатда ғолиб кела бошлайди.
Samsung: «Даҳо бўлиш шарт эмас».
Телефон бозорининг эгаларидан бўлган кореялик ана шу сўзлар билан бўлажак "ғаними"ни қарши олди. Apple Pencil қаламчасини тақдим қилганида Samsung Note туркуми учун тақдим қилинган стилусини пеш қилган. Стив Жобс ўз вақтида бу стилусни "фойдасиз матоҳ" деб атаган эди.
Samsung салга букланадиган iPhone 6'нинг устидан очиқчасига кулган. Ҳатто рақибига қарши рекламаларда Apple'ни кўчирмакашликда айблаб, «Даҳо бўлиш шарт эмас» деган шиордан фойдаланган. Бироқ, 2016 йилда кореяликнинг Galaxy Note7 фаблети оммавий ёниб кета бошлагач, Samsung ҳамма ҳам, жумладан ўзи ҳам хато қилиши мумкинлигини англаб етди.
Sony: «Уйғон, Apple».
Телефон бозорининг чинакам "эгалари"дан бўлган Sony қанчалар ҳазилкаш эканини кўрсатиш учун бир нима ўйлаб топди.
Apple 2015 йилда Sony'га таклифнома юбориб, матубот анжуманига расман таклиф қилади. Sony эса бу таклифга ҳисоблаш кодида жавоб йўллайди: «01000111 01100001 01101101 01100101 00100000 01101111 01101110 00101110».
Машина тилидан ўгирганда бу «Game on» («ўйин бошланди» ва [уйғон, Apple!]) маъноларини беради.
Японлар мана шу ҳазилидан сўнг мобил алоқа оламида эсда қоларли бирор таассуротли ёки донғи кетган ишни уддалай олишгани йўқ. Ҳатто, уларнинг телевизорлари ҳам энди пойгадан анча узоқлашиб кетган.
…бироқ 10 йилда iPhone намунага айланди
Японлар билан бирга, LG, Moto ва бошқа компаниялар Apple ҳақида жиддий ўйлашмаган ва уни масхаралаб келишган. Бу -- факт.
Бироқ, 2016 йилда бу киноя ва заҳарханда фикрларга нуқта қўйилди. Аниқроғи, Apple тақдим қилган 7-авлод айфонлари ниҳоят ҳар жиҳатдан пишиқ-пухта чиқди. Бу -- компаниянинг хатоларидан чиқарган хулосаларининг меваси бўлди.
Бугун юқорида номи саналган компанияларнинг бирортаси смартфон ишлаб чиқаришда Apple билан беллаша олишмайди. Уларнинг аксарияти смартфонсоз сифатида "ўлиб бўлган". Фақатгина Samsung кучли рақобатга дош бериб келмоқда.
Стив Жобснинг фикрича, лидер ва эргашувчи ўртасидаги ягона фарқ -- инновация. iPhone эса янгилик олиб киришдан ҳали ҳам чўчимаяпти. Жумладан, 2016 йилда бу смартфон анъанавий 3,5 миллиметрли аудио-туйнукдан воз кечди. Бу эса унинг нуфузига таъсир қилгани йўқ.
10 йиллик iPhone тарихида Apple ўзининг смартфон тамойили тўғри эканини исботлай олди. Бугун эса жаҳон смартфон саноатига iPhone 8 деган ном довруқ солмоқда. Кўпчилик экспертларнинг фикрича, бу флагман ҳам бошқа ишлаб чиқарувчилар учун илҳом манбаи бўлади.
