Илк лидарли планшет – iPad Pro 2020 тақдим этилди!

  •   DiMaX
  •  2513
  •  19.03.2020 14:36

Илк лидарли планшет – iPad Pro 2020 тақдим этилди!

Apple корпорацияси MacBook Air 2020 ноутбукини намойиш этгани хусусида ёзгандик. Купертинолик техногигант яна профессионаллар учун янгиланган планшетини ҳам тақдим қилди.

ЎҚИНГ: Apple март ойидаёқ битта эмас, камида иккита мобил гаджет тақдим этади!

iPad Pro 2020 планшетининг ҳам формати ўзгармаган – экрани диагоналига 11 ва 12,9 дюймлик моделларда чиққан. Дисплей атрофидаги ромлари аввалгидек юпқалигича қолган, лекин унинг ўзи анча яхшиланган. Энди бу планшет экрани 120 герцлик частотада янгилана олади, максимал ёрқинлиги 600 кд/м² бўлиб, кўз қамаштиришига қарши янада сифатли қоплама қўлланган.

Планшетдаги асосий ўзгариш эса камерага тегишли – энди у учта модулдан иборат! Асосий сенсорнинг аниқлиги 12 мегапикселлик бўлса, ультра кенг бурчакли иккинчи камера 10 МП аниқликда. Учинчиси эса катта янгилик – умуман планшетлар тарихида илк бор лидар (LiDAR) қўлланган. Бу – ёруғлик аксланиш тезлигини аниқлаш эвазига объектгача бўлган масофани ўлчовчи махсус камерадир.

Лидар 5 метргача масофада ишлай олади. Ушбу модул эвазига iPad Pro 2020 суратга олинаётган саҳна чуқурлигини ҳамда хона ичидаги исталган объектгача бўлган масофани янада аниқ ўлчайди. Бу эса биринчи навбатда тўлдирилган борлиқ технологиялари ва узунликни, масофани ўлчовчи «Рулетка» каби иловалар учун керак. Масалан, лидар қўлнинг кўтарилиш бурчагини юксак аниқликда ўлчашга қодир.

Миш-мишларга қараганда, худди шундай лидар ёки 3D-камера iPhone 12 туркумида ҳам бўлади.

ЎҚИНГ: iPhone 12’нинг лазерли 3D-камераси қандай бўлади?

iPad Pro 2020 яна 7 мегапикселлик селфи-камера, Wi-Fi 6 ҳамда Bluetooth 5.0 интерфейслари, USB-C порти билан таъминланган. Ишлаб чиқарувчи унинг 10 соат автоном ишлай олишини таъкидлаган, яна уяли алоқа модемига эга версияси ҳам бор. Янги планшет минимал конфигурацияда аввалгидек 64 эмас, балки энди 128 гигабайтлик ички хотира билан чиқарилган.

iPad Pro 2020 планшети янги Apple A12Z процессорида ишлайди; аммо унинг оддий Apple A12 чипсетидан фарқи ҳозирча номаълум. Афтидан, самарадорлик бўйича у аввалги даражада қолади, фақат лидар ва бошқа янги функцияларни қўллаб-қувватлаш қўшилган.

Яна бир муҳим янгилик – iPad Pro тўлақонли курсорни қўллаб-қувватлайди. У энди тачпад ва сичқонча билан биргаликда ишлай олади; компания бунинг учун махсус Magic Keyboard ғилоф-клавиатурасини ҳам тақдим этди.

Янги планшетнинг 11 дюймлиги модемсиз версияда 800 – 1300 доллар, уяли алоқа модемига эга талқинда эса 950 – 1450 доллар туради. Экрани 12,9 дюймлик модели эса модемсиз 1000 – 1500 доллар, модемли версияда 1150 – 1650 долларга баҳоланган.

Magic Keyboard алоҳида сотилади – планшетнинг ўлчамига қараб 300 ҳамда 350 доллар туради. Шу билан бирга, у аввалги авлод iPad Pro билан ҳам ишлай олади. Янгиланган клавиатура – Smart Keyboard Folio эса ўлчамига қараб 180 ва 200 долларга нархланмоқда.

ЎҚИНГ: "Apple, четга ўт!": Huawei янги флагман тақдим этди (+фотогалерея)

Terabayt.uz сайтининг видеолари: Youtube'даги каналимизда!