Илон Маск миллиардларини қандай топган?
"Ҳақиқий ҳаётдаги Тони Старк" деб аталувчи Илон Маск ўз ҳаракатлари билан миллиардерликка эришган муҳандис, келажакни олдиндан кўра билган олим ва сармоячи ҳисобланади.
Илм-фан, технология ва молия соҳаларида юксак чўққиларга эришган Маск икки йирик компания — Tesla Motors корпорацияси (NASDAQ: TSLA) ва SpaceX хусусий компаниясининг Бош ижрочи директоридир.
У ўз бойлигининг катта қисмини 20 йилдан ортиқ муддат давомида аввалги компанияларини сотиш ёки акцияларни савдога қўйиш билан жамғарган. 1999 йилда илк компанияси Zip2'ни Compaq'қа сотган. Шартномага кўра, Маскка 307 миллион доллар пул ва 34 миллион доллар қийматдаги акция тақдим қилинган. У бу маблағни, кейинчалик PayPal Holdings (NASDAQ: PYPL) корпорациясига айланган, X.com'га асос солишга сарфлаган. PayPal ҳам 2002 йилда 1.5 миллиард доллар эвазига eBay'га (NSDQ: EBAY) сотилган.
1998 йилда (2007 йилда Dell томонидан сотиб олинган) Everdream корпорациясига сармоя киритиб инвесторга айланган Маск, сунъий онгга ихтисослашган DeepMind Technology'га (бу компанияни эса 2014 йилда Google сотиб олган) ҳам инвестиция киритган.
Tesla
Tesla'нинг 22% акциясига эгалик қилувчи Илон Маск компаниянинг энг катта инвесторидир. У, шунингдек, компания асочиси ва Бош ижрочи директори ҳамдир.
Бундан ташқари, Tesla ўз олдига қўйган маълум режаларни амалга оширса, Маскка 2018 йилги акциялар қиймати бўйича 2.6 миллиард доллар улуш ҳам берилади. Ваҳоланки, ушбу тўлов амалга оширилиши келган пайтда акциялар қиймати 56 миллиард долларга етиши тахмин қилинади. Компания раҳбари сифатида Маск ҳеч қандай маош олмайди.
SolarCity
SolarCity қуёш панеллари ишлаб чиқарувчи компания бўлиб, унга Маскнинг холаваччаси томонидан асос солинган. Компанияни Tesla 2016 йил 2.6 миллиардга сотиб олган. Худди шу даврдан бошлаб, SolarCity'нинг бизнеси қисқариб келмоқда, чунки Маск компания фаолиятининг катта қисмини Тесла мобилларнинг 3-моделини яратишга йўналтирган.
SpaceX
Илон Маск SpaceX хусусий компаниясининг 54% акциясига эгалик қилади, тахминларга кўра, бу 33.3 миллиард долларга тенг. АҚШ ҳукумати NASA ва Ҳаво кучлари воситасидаги шартномалар орқали SpaceX билан ҳамкорлик қилиб, сунъий йўлдошларни фазога олиб чиқади. Айни дамда ҳукумат соҳадаги етакчи компаниялар, айниқса, Boeing ва Lockheed'лардан кўра SpaceX билан кўпроқ ҳамкорлик қилмоқда. Ҳукумат билан бир қаторда, SpaceX хусусий компаниялар билан ҳам шартномалар имзолаб, тижорий парвозларни амалга оширади.
SpaceX Халқаро фазовий станцияга ўзининг 100 дан оэтиқ миссияга эга фазо кемасини чиқарган. Айни дамда компания Starlink деб номланувчи истиқболли лойиҳа устида ишламоқда. Бундан кўзланган мақсад Ер сайёрасининг барча ҳудудларини сунъий йўлдошлар билан қоплаб, дунё аҳолисини тезкор ва ишончли интернет билан таъминлашдир.
Мол-мулклари
Илон Маскнинг кўчмас мулкларининг умумий қиймати ҳақида аниқ маълумот мавжуд эмас. Бироқ Маскнинг Лос-анжелесда бир неча уйлари бўлиб, уларга 55 миллион доллар сарфлаган.
