Илон Маск шу йилиёқ одамларни киборгга айлантира бошлайди! (+видео)

  •   DiMaX
  •  3600
  •  11.05.2020 16:58

Илон Маск шу йилиёқ одамларни киборгга айлантира бошлайди! (+видео)

Инсон мияси ҳамда компьютерни ўзаро боғлаб қўйиш технологиясини ривожлантираётган Neuralink компанияси ҳам Илон Маскка тегишли. Яқинда таниқли телебошловчи Жо Роган дастурида қатнашган бизнесмен бу бордаги амалий натижани шу йилиёқ кўрсатишга сўз берди.

ЎҚИНГ: Neuralink одамни киборгга айлантирмоқчи – бу қанчалар хавфли?

Neuralink технологиясига кўра, нейронларни стимуллаш учун ўта нозик электродлар бевосита мияга имплантация қилинади. Компания бу тадқиқот устида тўрт йилдан буён ишлаб келмоқда. Ҳозиргача мазкур технологияни маймунлар ва сичқонларда муваффақиятли синаб кўришган, энди эса одамларга, шу йилнинг ўзидаёқ татбиқ этишмоқчи.

Мазкур процедура тананинг баъзи аъзоларида орқа мия жароҳати туфайли юзага келадиган фалажликни даволашда қўлланади. Маскнинг фикрича, агар ҳаммаси кўнгилдагидек чиқса, ушбу технология мияни сунъий идрок билан синхронлаштиради.

ЎҚИНГ: Фикр кучи орқали мулоқот қилишни қачон бошлаймиз?

 «...Биз бош чаноғининг бир қисмини кесиб, у ерга Neuralink қурилмасини ўрнатамиз, кейин эса электрод толалари эҳтиёткорлик билан мияга уланади. Кейин эса ҳаммаси тикиб қўйилади. Қурилма миянинг исталган қисми билан ўзаро таъсирлана олади ва йўқотилган кўриш имкониятини ёки қўл-оёқлар ҳаракатини тиклайди», – дейди Илон Маск.

Neuralink раҳбарининг таъкидлашича, чипнинг ўлчами почта маркасидан катта бўлмайди. «Яраси битиб кетганидан сўнг кишига чип ўрнатилганини ҳеч ким пайқамайди ҳам», – дейди у.

«Мазкур технология кўплаб хасталикларни даволашда ёрдам бериши мумкин. Масалан, инсульт асоратларини бартараф этиш, яъни мускуллар устидан назоратни қайта ўрнатиш мумкин. Neuralink ҳатто Альцгеймер касаллигида хотирани тиклашга ҳам ёрдам беради», дея таъкидлайди Илон Маск.

ЎҚИНГ: Ходимларига микрочип ўрнатаётган реал компания

Тадбиркорнинг сўзларига кўра, якуний версияда чип Bluetooth ёрдамида боғланадиган бўлади. Бу эса фалажланган кишиларга ҳам компьютер, смартфон ёки ўз протезларини бошқариш имконини беради.

Булардан ташқари, Илон Маск ваъда беришича, Neuralink келажакда кишилар учун сўзлар иштирокисиз, телепатия ёрдамида ўзаро мулоқот қилиш имконини яратади. Унинг прогнозларига кўра, агар технологиялар ривожи шу йўсинда давом этса, яқин 5–10 йилларда бунга эришиш мумкин бўлади.

ЎҚИНГ: Роботлар учун тери яратилди – энди улар сеза олишади! (+видео)