Илон Мaск Twitter бош қароргоҳига сувчаноқ (раковина) кўтариб келди

Илон Мaск Twitter бош қароргоҳига сувчаноқ (раковина) кўтариб келди

Tesla ва SpaceX компаниялари раҳбари, Илон Маск, ваниҳоят Twitter'ни сотиб олмоқда. Миллиардер жорий йил апрелида ижтимоий тармоқ компаниясини 44 миллиард долларга сотиб олишини маълум қилди ва ой охирида Twitter келишувга рози бўлди. Бироқ вақт ўтиб, у Twitter'ни платформадаги ботлар сони ҳақида нотўғри маълумот берганликда айблади ва ўз фикридан қайтмоқчи бўлди. Натижада эса Twitter уни келишувни бузганликда айблаб судга берган эди. Ёз ойида бўлиб ўтган бир қанча суд музокараларидан сўнг, миллиардер октабр бошида ахийри ижтимоий тармоқ компаниясини сотиб олишини айтди, суд эса унга 28 октабргача келишувни якунлашни буюрди.

Чоршанба куни Илон Маск ўзининг Twitter'даги расмий саҳифаси биосини "Chief Twit"га, манзилини Twitter'нинг Сан-Францискодаги бош қароргоҳига ўзгартирди ва бироздан кейин у ерга ташриф буюрди. Қўлида сувчаноқ (раковина) билан худди ўз уйига кириб келаётгандек кўринадиган видеони миллиардер "Twitter бош қароргоҳига кириш" ва "чўкишига имкон беринг" (тушуниб олишларига вақт, имкон бериш маъносида) ибораси билан твит қилди.

Insifer'нинг хабар қилишича, Twitter'нинг маркетинг бўйича бош директори Лесли Берланд ходимларга Маск ҳафта давомида офисда бўлиши ва жума куни ишчилар билан учрашиши ҳақида электрон почта хабарини жўнатган:

"Илон бу ҳафта Сан-Францискодаги офисда одамлар билан учрашмоқда, залларни кезмоқда ва барчангиз қиладиган ишлар билан шуғулланишда давом этмоқда. Агар сиз ҳам шу офисда бўлсангиз ва уни атрофда кўрсангиз, салом айтинг! Бошқалар учун эса бу Илон билан кўплаб учрашувлар ва суҳбатларнинг бошланиши, жума куни барчангиз тўғридан-тўғри ундан эшитасиз" дейилади хабарда.

Душанба куни бўлиб ўтган видео конференсияда Илон Маск банкирларни Twitter билан келишувни жумагача ёпмоқчи эканлигидан хабардор қилган, ёхуд банкирларга шу кунгача "пулларни тайёрлаб қўйиш"лари буюрилган эди. Эҳтимол, миллиардернинг Twitter'га ташрифи унинг деярли компанияни сотиб олиб бўлганлигини, аммо ҳали расмий баёнот чиқмаганлигини англатади.

ЎҚИНГ: Google жаримага тортилди

Terabayt.uz сайтининг видеолари: Youtube'даги каналимизда!